SHILLONG:
Ka Khun Hynniewtrep National Awakening Movement (KHNAM) ka la pynbna ba kan sa thoh sha ka sorkar ban kyntu na ka bynta ban pyntreikam noh ïa ka Inner Line Permit (ILP) ha Meghalaya.
U Bah Thomas Passah, Working President ka KHNAM u la pynpaw ïa ka jingbym sngewhun halor ka jingbym ïaid shaphrang ka mat jong ka ILP watla ka la don ka rai ha ka Dorbar Thawaiñ ba mynshuwa, da kaba kdew ba ka rai ka dei ka buit ban pynbieij ïa ki paidbah.
U la pyni nuksa ïa ki rai bym lah ban pynbeit kum ka rai ban kynthup ïa ka ktien Khasi ha ka Khyrnit kaba Phra jong ka Riti Synshar ka India bad ka rai halor ka ILP ha u snem 2019.
Ha kaba ïadei bad ka Meghalaya Residents Safety and Security Act (MRSSA), u Bah Passah u la ñiew ba kam biang satia ban tehlakam ïa ka jingtuid ki briew kiba nabar bad kyntu ïa ka sorkar ba ka long kaba donkam ban pyntreikam ïa ka ILP.
U la kam ruh ba ka MRSSA kam shym lah ban weng ïa ki mat kiba ïadei bad ka jingpoi beaiñ ki mynder, kaba la pynlong ïa ki kynhun jong ki paidbah ban shimti hi na ka bynta ban lap ïa ki.
U la kdew ruh ba ka jingpyntreikam ïa ka ILP kan ym ktah satia ïa ki nongjngoh kai pyrthei, namar kin shngaiñ bad kan long ruh ka jingmait lynti ïa ki nongshangkai pyrthei.
U la kdew ba ïa ki nongshangkai pyrthei ym dei ban ñiew kum ki mynder bad kim dei ban shah pynwit, da kaba pynthikna ba ka ILP kan long kaba ïahap ban kyntiew ïa ka kam jngoh kai pyrthei.
Haba la ïoh jingtip ba ka jingpyntreikam ïa ka ILP kan dangshim por, u Bah Passah u la kdew ba ka long kaba donkam ïa ki Autonomous District Council ban peitngor bha ïa ka jingtuid ki briew ba nabar.
