SHILLONG:
Ki jaidbynriew Garo kiba shong ba sah shabar ka Meghalaya kim lah ban ïoh ïa ki kam sorkar ha ka jylla.
Ïa kane la ïathuh da u Myntri Rangbah ka Meghalaya u Conrad Sangma ha ka Sngi Hat Majai.
U Myntri Rangbah Conrad Sangma hadien ka jingïalang ka Cabinet ha ka Sngi Hat Majai u la kdew ba la mynjur ïa ka Office Memorandum (OM) jong ka Personnel Department halor ka bhah thungkam bad ka reservation roster.
“Ka Cabinet mynta ka sngi ka la mynjur ïa ka Office Memorandum (OM) jong ka Personnel Department halor ka Resevation Policy bad Reservation Roster”, ong u Conrad Sangma.
U Myntri Rangbah u la ong ruh, “Ka Office Memorandum ba la pynmih ha u snem 1972 ha kaba ïadei bad ki kam ba lait na ka bynta ki Scheduled Tribe (ST) bad ki Scheduled Caste (SC), ka kdew ba ki kam ba lait ba pynbna paidbah ki dei ban don 9 tylli lane duna na ki kam ba la pynbna na ka bynta ki jaidbynriew ba dei ban ïoh, kin ym mih shuh nangne shakhmat, namar ka donkam ban bud ïa ki point ka Roster ha ka bhah thungkam”.
“Kane ka mut ba nangne shakhmat, ïa ki kam ba la pynbna yn thung katkum ka Roster Point bad ym katkum ka jingdon ki kam ba la pynbna paidbah”, u la bynrap.
“Ka Cabinet ka la pynthymmai ruh ïa ka OM ba la pynmih ha u snem 1974 ha kaba ïadei bad ki kam ba la mang na ka bynta ki Garo, ha kaba nangne shakhmat, ïa ki kam ba dei ïa ki Garo yn pyndap da ki kyrtong na Garo hapoh ka jylla. Ha ka OM kaba mynshuwa la shah ia ki Garo na shabar ka jylla ban pyndap ha ki kam ba lait”, ïathuh u Myntri Rangbah ka Meghalaya.
Ka Cabinet jong ka Meghalaya ka la mynjur ruh ïa ka OM jong u snem 2020 ha kaba ïadei bad Reservation Roster na ka bynta ki briew kiba don jingduna dkhot met, ha kaba nangne shakhmat ka jingmang bhah ïa kiba don jingduna dkhot met la buh katkum ki point ha ka Reservation Roster.
Shuh shuh la bynrap ïa ki kyndon ba thymmai ha ka OM jong ka Reservation Policy na ka bynta ki kyrtong kiba aplai ia ki kam ha ki district. Katkum ki kyndon ba thymmai, ki kyrtong kiba aplai lyngba ki District Selection Committee ki dei ban long kiba nang ïa ka ktien jong ka district.
