SHILLONG:
U Myntri ka sorkar jylla ba dei ruh u MLA ka West Shillong konstitwensi, u Bah Paul Lyngdoh, ha ka 9 tarik Jylliew u la ong ba ki jingjia pynkulmar kiba jia dang shen ha Mawprem ki dei na ka daw ka jingkiew palat ka jingkyrni drok ha ka nongbah ha kaba ki briew bym shym la ithuh durkhmat ki la wanrah jingkulmar bad kiwei kiwei ki kam pynjot bad pynjulor.
“Nga la dep ïakren bad ki pulit bad ngin sa shong jingïalang bad ka Dorbar Shnong ha ka tnad pulit ban tohkit halor kane ka mat,” la ïathuh u Bah Paul Lyngdoh.
U la ïathuh ba katkum ba la lum jingtip, kiba bun na ki nongkhaïi drok bad ki riew kyrni ki ju pynkulmar bad kynroi ïa kiwei pat ki nongkhaïi ne ki ba dih drok, kaba lam pat sha ka jinghuri hura ha lynti syngkien.
Haba kylli la kine ki kam ki don ei-ei bad ka saiñ pyrthei, na ka liang u Bah Paul u la kyntait ïa kata.
Ka jingkren na ka liang u myntri ka long hadien ba la mih ki jingujor ba ju don ki jingjia pynjot pynra bapher bapher ha ki thaiñ Mawprem, ha kaba la don ka jingthang ïa ki kali ar shaka bad ruh ka jingpyn julor ïa kiwei pat ki kali kaba la pynlong ïa ki nongshong shnong ban don ka jingsngew khia halor kane.
U Bah Paul u la ong ba ka sorkar ka skhem jingmut ban shimkhia ïa kane ka mat jong ka jingkyrni drok bad ba na ka liang jong u un sa ïatrei lang bad ki pulit ryngkat ki Dorbar Shnong ban pynbeit ïa kane.
Shuh shuh u la kyntu ruh ïa ki nongshong shnong ba ki dei ban ujor beit sha kin pulit haba don kano kano ka jingsngew artatien lane shan khmat ïano ïano.
