SHILLONG:
Halor ka jingjia ha Rngaiñ, ka Federation of Khasi Jaiñtia and Garo People (FKJGP) Ri war Mihngi ka la maham ba ka lah ban don ka jingjia khyllem lum hynrei kam shym la don kano kano ka jingshim khia.
Na ka liang u secretary jong ka information unit, u Evanfield Khonglam, u la ïathuh ba la wanrah ïa kane ka mat ha ka ophis u Sub-Divisional Officer ka Pynursla, myn ha ka 6 tarik Ïaïong.
“Ngi la phah ïa ka shithi ryngkat ki dur jong kane ka jaka hynrei kam shym la don ka jingpynphai jubab na ka liang ka ophis. Lada u SDO u ong ba kane ka shithi kam shym la poi sha u kamut ka don ka jingduna ha ka rukom trei jong katei ka ophis,” haba kdew artad ba la pdiang ïa ka shithi da u dkhot ba trei ha katei ka ophis.
Haba ïadei bad kane, ka seng ka la wanrah ïa kane ka mat sha u district administration halor ka ARSS Infrastructure Projects Limited ban shimkhia halor ka jingma ba ap ha kane ka jaka hynrei kam don jingmyntoi ei ei.
“Kawei ka soskular kaba ngi la buh bad ka ARSS ka long ba dei ban don ka kynhun Quick Response Team kaba lah ban ai jingïarap kyrkieh haba don kano kano ka jingjia mynsaw hynrei kata ka jingtyrwa ruh kam shym la urlong,” u la ong.
Ka seng ka la dawa ba ka sorkar jylla ka dei ban pyn sangeh noh ïa kane ka kompeni ban bteng ïa ka jingpyntrei ha kane ka jaka.
Katkum ki nongshong shnong ha kane ka jaka ki la ong ba kaba sngew phylla ka long, ka jingjia twa u lum ha kane ka jaka ka long ka daw ba la pynpaw pyrthei ïa ka jingbym biang ka rukom pyntrei ha kane ka jaka.
Ka la don ka jingkynnoh na iwei i nongshong shnong ha kaba i la ong, “Ka don kumba 50 tylli ki trok ha ka shisngi kiba ju shalan maw sha Bangladesh. Dei na kata ka daw ba ki kyrkieh ban pynpra ïa une u lum khlem da pyrkhat”.
Watla da ki spah tylli ki trok ki ïaid lyngba ka surok bah, hynrei tang khyndiat kiba ïoh jingmyntoi na ki jaka tih maw, u la ïathuh. Ki ba bun napdeng jong kine, ki im ja na ka kam bylla bad ka kam rep bad ki ba bun ki briew ba trei ha ki jaka tih maw ki dei na kiwei ki distrik jong ka jylla, la bynrap u nongshong shnong.
Ha kane ka khyllipmat, ki nongshong shong ki phai khmat sha ka surok ba kham heh bad ba kham ïar katba ki dang pyndonkam ïa kane ka surok da ka jingsyier mynsiem. Hynrei ha kajuh ka por, ki don kiba artatien halor ka jingdonkam ïa ka surok ba kham heh ha kane ka kynti ba mynta namar ba ka kam ïadie ïathied ha kine ki thaiñ ki dang duna.
Ka jingwanrah ïa ki kam pynroi bad ki jingtei ka long ba ki khmih ba kan ai jingmyntoi ïa ki nongshong shnong, hynrei haba jia kum kane ka jingjia, ka mih ka dak jingkylli , hato sa katno ngut kin shim ïa ka jingim briew kat haduh da lah ban pyndep pura ïa kine ki jingtei?
