SHILLONG:
Ka Federation of Khasi Jaiñtia and Garo People (FKJGP) Sengkmie, ka la kyntu ïa ka Sorkar Meghalaya Democratic Allian –II ba kam dei ban pynlong langknia ïa ki samla Khasi Jaiñtia da ka ba pyntreikam shadien ïa ka roster system.
Katkum ka kyrwoh ka ba la phah da u Kitboklang Nongphlang u Vice President ka FKJGP u la ong ba “Hadien ba kala ïoh jingtip ba ka sorkar MDA ha ka 19 tarik Jymmang 2023 kan khot ïa ka jingïalang jong baroh ki seng saiñ pyrthei ban ïatai halor ka Roster System kaba long kawei na ki mat kaba la pynkhih phaloh ïa ka jingmut jing pyrkhat ym satia tang ïa ki khun samla ki ba khmih lynti ban ïoh ïa la ka hok ka bhah ha ki kam sorkar hynrei kumjuh ruh wat ïa ki kmie ki kpa kiba don ka jingkit khlieh ban saiñdur ïaka lawei jong ki khun ki kti bad kumjuh ruh ïaki paidbah nong shong shnong jong ka jylla hi baroh kawei”.
“Ka Federation of Khasi Jaiñtia and Garo People (FKJGP) kum kawei na ki seng bhalang kaba don ïaki dkhot jong ka ha baroh kawei ka jylla kaba la ai ïa ka jingshakri jong ka mynta la palat 33 snem kynthih ka dap da ka jing bynniaw ban ïohi ïaki jinglong jing man halor ka jing pyrshang jong ka sorkar jylla ban kyrtiang dien pynban naduh u snem 1972 ban pynbeit thymmai ïa kata ka Roster System hadien bala mih ka jingbthah na ka iing kashari badon burom jong ka jylla Meghalaya (High Court of Meghalaya)”.
Ka FKJGP ka kyntu jur ïa baroh ki seng saiñ pyrthei kiba don hapoh jong ka jylla Meghalaya ba kim dei shuh ban dang kyrtiang dien ïa ki 50 snem kiba la leit noh hynrei ban saiñdur thymmai ïa ki 50 tylli ki snem ki ban sa wan lada ki don shisha ka jing kit khlieh bad ka jing ïohi jngai.
“Ka FKJGP ha kajuh ka por ka kyntu ruh ba baroh ki seng saiñ pyrthei ki ban leit sha katei ka jingïalang lahshai ka sngi ba kin shim ka jingkit khlieh ba ka tarajur kam dei satia ban noh shiliang”, la ong ka kywoh.
