SHILLONG:
Hadien bun bnai ba ka ki nongñiah kali kamai jong ka shnong Mawlai ki la pynsngew ïa ka jingeh ha kaba ïadei bad ka jingbymdon jong ka jaka pynïeng kali; mynta ka kynti da ka jingïatrei shitom lang ki la ïoh ïa ka jaka pynïeng kali bad kane kan pynsuk ïa ki paidbah kiba leit sha Mawlai.
Ki nongïiah kali kamai hapoh ka shatri jong ka ‘Motphran to Mawlai Taxi Drivers and Owners Association’, ha ka jingïatreilang bad ki nongïalam jong ka Seng Samla Mawlai Pyllun, ki la leit ban ïakynduh ïa ki bor district, bad ruh ïa u DSP traffic ba kin phaikhmat lem ha kaba ïadei bad kane ka jingeh kaba ki ïakynduh. Hadien kane, ka seng ka la ïoh ïa ka jaka ïeng kali ne ka stand ba kin ïoh ban thep briew da kaba suk.
Haba ïakren bad u President ka Association u bah James Dohkrut, u la ong ban pynsuk ïa ki paidbah nongleit nongwan jong ka Mawlai, ki nongñiah kali ki la ïaleh ban ïoh ïa kane ka stand bad mynta ki la ïoh ban pyndonkam. Kine ki dribar ki la kyntu ruh ïa ki paidbah ba kin wan sha kane ka jaka ba kin suk namar kumba long baroh shikatta; lada ki paidbah ki jah tiar ha ka kali kaba ki shong kim tip shuh ha kano ka kali ki shong hynrei lyngba kane ka stand kin ïoh biang lada jah ki tiar jong ki ruh.
U la ong ruh, “Bun ki nongshong kali ki klet ïa ki kot ki sla, bad kim ïoh shuh namar kim ithuh ïa ka kali kaba ki shong namar bun kiba kamai ki dei kiba na kiwei ki jaka ki shu kamai sha Mawlai, hynrei da ka jingdon jong kane ka stand kin lait na kine jingeh.” “Bun ki paidbah ki ju ud, ju nam haba ïadei bad kane ka jingeh kaba ki ïakynduh la ka dei halor ka bai kali ne kiwei,” u la ong.
U bah James u la ïathuh ruh ba ka kali kan ïaid lyngba ka surok karikhana, kan rung shajan ka ïing u bah S D khongwir, Stand Bos, Kynton Massar bad shaduh NEHU. U la ïathuh ba ki la ïakren ruh ïa ka dor jong ka bai kali, kaba naduh Motphran haduh ki bynta jong ka lad Nongpdeng kan dei 20 tyngka, khnang ba kan ym khia ïa ki paidbah nong Mawlai. Shuh shuh u la ong ïa ki paidbah ba ki lah ban wan ha kane ka stand ban leit sha ki bynta bapher bapher jong ka Mawlai.
“Ka dor bai kali na Motphran sha Lad Mot bad lad Nongpdeng kan dei 20 tyngka, shaduh Stand Bos bad Kynton Massan kan dei 30, shaduh Mawkynroh, NEHU kan dei 40 tyngka naduh na ïew,” u la ïathuh. Na ka liang u President ka SSMP, u bah Samuel Biam, u la ong ba kane ka dei ka jingtrei shitom jong ki nongñiah kali bad ka jingsngap jong ki bor bahalor kaba ailad ban buh ïa kane ka stand na ka bynta ki nong Mawlai bad kane kan ïarap shibun ïa ki nongleit nongwan.
U la kyntu ïa baroh ki paidbah Mawlai ban ïatreilang na ka bynta ka bha ka miat, ha ka leit ka wan. U la ong ruh ba da ka jingdon jong kane ka jaka ïeng kali, kan pynsuk ïa ki paidbah kiba kit mar kit mata, ‘namar kin ïoh ka por ban thep ym kumba long mynshuwa, ha kaba ki hap ban leh kyrkieh bad teng teng ki klet noh ruh ïa ki tiar tang na ka daw jong ka jingshah beh ha ki pulit pynïaid kali’.
