SHILLONG:
U MLA ka Gambegre Constituency u Saleng Sangma u la ong ba ka jingthombor jong ka jylla Assam kam dei shuh tang ïa ka jylla Meghalaya hynrei ka dei ïa baroh hi ki jylla ki ba don ha ki thain lammihngi jong ka Ri.
“Ka jingjia ha Mukroh ka dei ka jingjia ka bym lah ban pdiang hynrei lada peit ïa ki jingjia kiba la dep, ka Assam ka ju thombor ym tang ïa ka jylla Meghalaya hynrei wat ïa ka Arunachal Pradesh, Manipur, Mizoram, Nagaland”, u la ong.
“Ka ju don jingshah thombor na ka Assam bad haba peit ïa ki jinglong jingman kaei kaba ngi la ïohi kam dei ka sien kaba nyngkong kum kane ka jingjia ka la dep ban jia ha Langpih bad mynta ha Mukroh bad ha kiwei kiwei ki jaka kiba jan u pud u sam bad ka Assam”, u la bynrap.
U la ong ruh kaba lyngngoh ka long ba ka jylla Meghalaya kam ju mad jingeh kum kine ha kaba ïa dei bad ka Ri Burma, ka Ri Myanmar lane ka Ri Bangladesh kaba ïapher ki Ri hynrei hapoh Ri la lap ïa kum kine ki jingjia.
“Ka jaka kam dei jong ka sorkar Assam ne jong ka sorkar Meghalaya hynrei ka dei jong ki paidbah ki nongshong shnong ha kato ka jaka, kim dei ban tieng ïa kum kine ki jingjia”, u la bynrap.
“Halor ka jingjia ha Mukroh ki bor ba dei peit jong ka jylla ki dei ban shim bad pyntreikam ïa ka bor pyrshah ïa ki pulit Assam ha kato ka sngi hi namar ba ka khlem jia ha ki jaka ba don ka jingïakajia “la ong u Saleng.
