SHILLONG:
U Myntri ba dei peit ïa ka tnad kam pohïing ha ka jylla u ba long ruh u Symbud Myntri Rangbah, u Bah Prestone Tynsong, u la ong ba ha ka ba ïadei bad ka jingtehlakam ïa ka jingtih bad ka jingkhaïi dewïong beaiñ, ki pulit ha ka jylla ki long ki ba biang palat.
“Ki pulit ha ka jylla ki long ki ba la biang nadong shadong ban tehlakam ïa baroh ki kam beaiñ ha ka jylla hynrei lada don ki pulit ki ba trei baroh 24 kynta ruh, ki kam sniew ki ju jia bad phim tip lano u nongtuh un wan ha ka ïing jongphi”, la ong u Bah Prestone haba kren sha ki lad pathai khubor.
“Hynrei ka tnad kan shimkhia ban pynthikna ba ka jingtih bad ka jingkhaïi dewïong dei ban pynsangeh mardor la ka long kumno kumno ruh”, u la bynrap.
Halor ka Central Industrial Security Forces (CISF) u Bah Prestone u la ong ba “Kane ruh ka dei ka rai jong ka High Court hynrei kumba nga ong ba ka tnad pulit ha ka jylla ka long ka ba la bit la biang bha ban tehlakam ïa kum kine ki kam beaiñ ki ba don ha ka jylla”.
Ha ba kylli ba hato ka Sorkar kan ujor pyrshah ïa kane, u la ong ba “Ngam lah ban ong eiei mynta halor kane, hynrei ïa ka jingthoh ladep ban phah na ka Ministry of Home affair, sha kane ka orgasation, ha kaba ki la ïoh ruh ïa ka jubab ba ki duna briew ban ai”.
