NONGSTOIÑ:
Ka Seng HYC West Khasi Hills ryngkat ka Seng HANM ki la pynlong ïa ka jingthang mombati ha jynkieng Nonbah, Nongstoiñ kum ka dak ban sngewlem ïa ki lanot kiba la khlad noh ha ka jingshah siat ha ki pulit Assam ha Mukroh.
Ha kane ka janmiet, la sakhi ba ki paidbah ruh kila ïasnoh kti lang ban ïa thang ïa ki mombati hapoh ka sor Nongstoiñ ban phah ka jingsngewlem sha kiba ha ïing jong ki 5 ngut kiba la khlad na ka jingjia ha Mukroh.
U President ka HYC West Khasi Hills District u Samla Lumlang Kharsyiemlieh haba ai jingkren ha katei ka jingïalang, u la ong ba ka tnad pulit Meghalaya kam dei ban sngewrem ïa ka jinglong tlot jong ki namar ha ka jaka ban ïada ïa ki paidbah pynban ki long kylla tang ki nongleit ñiew ïa ki kuli ba la siat da ki pulit Assam ïa ki paradoh para snam ha Mukroh.
Shuh shuh u la ong ruh ba nang mut ba ki pulit ka jylla ki dei ki nongïada hynrei ki dei pynban ki nongshet kylla ha kaba tad hadien ba ki pulit Assam kila phet na katei ka jaka ba ki sa leit kheiñ katno kuli ka Assam ka la siat bad u la ther tyngeh ruh ïa ki nongmihkhmat ka Jylla da kaba u la ong ba kiba bun na ki nongmihkhmat kim sngewsih na ka jingjia shah siat ïap ki paradoh para snam ha Mukroh hynrei ki sngewsih ba ïoh ki rem ïa ka elekshon na kane ka jingjia.
Katba na ka liang u Bah Wilson Sohshang u President ka HANM u la ong ba ki pulit Assam ki la pynkheiñ ïa ka kyndon aiñ ba 21 jong ka Riti Synshar ka Ri India bad kata ka dei ka hok ban im.
U la ong ba kam don shuh kano kano kaba lah ban buria na ka bynta ka jingduh noh ïa kine ki mynsiem ba kordor bad ka jingjia jong kine kiei kiei kadei namar ka jingtlot ka synshar ka khadar hapoh kane ka jylla bad kane kadei namar ka jingtlot jong ki 60 ngut ki nongmihkhmat kiba ngi la jied.
Ki nongkren kila dawa ruh ba u Myntri kam Pohïing ka sorkar jylla u dei ban hiar shuki noh namar ba um sngewthuh ïalade haei u shong.
