SHILLONG:
U Assistant Inspector General (AIG) barim ka Meghalaya Police u Bah GK Iangrai, ha ka 14 tarik Rymphang u la kam ba ki don shibun ki shyieng (skeleton) hapoh ka tnat Pulit bad la pynlong langkñia ïa u ban tep eit miaw ïa ki kam bamsap hapoh ka tnat.
Haba kren sha ki lad pathai khubor mynta ka sngi hadien ba la pyllait jamin ïa u, u Bah Iangrai u la kynnoh ba katba u dang don ha ka kti ki pulit hadien ba la kem ïa u, la ïuh roit ïa ka hok longbriew man briew jong u bad u la ïathuh ruh ba u la phah ka jingujor sha ka ïing kashari halor kane.
Haba kynnoh ba ka jingshah kem jong u ka dei ka jingkput politik, u Bah Iangrai u la ong ba ka don ka jingma ka ban sa jia ïa ka jingim jong u bad ki ba ha ïing ha sem jong u.
“Ki khanglad ïa nga ban kren pyrshah ïa ki bad ban thad madan ïa ki kam jong ki. Kane ka dei tang ka kput politik. Ka sdang da ka jingtohkit bad katba dang tohkit, ki pyllait tuh ïa ka kaiphot da kaba kam ba ki sheptieng ïoh ngan pynkylla ïa ki sakhi satar. Hynrei ki sheptieng ïoh nga thad madan ïa ki,” la ong u Bah Iangrai.
U Bah Iangrai u la pynpaw ka jingshaniah ïa ka ïing kashari bad u la ong ba kum u ophisar pulit Khasi, u la lah ban leh shibun kiei kiei mynba u dang shong ha ka shuki kum u AIG bad kane ka la pynlong ïa kiba bun ba kin bishni ïa u.
“Nga dei u briew, nga lah ban bakla haei re haei, hynrei balei ki sahnarphna ïa nga kumne? Kumno ïa kiwei pat ki briew?” u la kylli.
Haba pynpaw ba ka don ka case kaba la 20 snem eiei kaba la sop pum pum, u Bah Iangrai u la ong ba kane ka case ka don ïa ki kyrteng jong ki katto katne ngut ki heh ki haiñ kaba kynthup ïa kiba la shong thait bad ruh ïa ki ban sa shong thait, “hynrei kim nud ban tohkit halor kane ka case”.
“Nga long uba lui lui tad haduh ban da lah ban pynshisha ba la pynrem ïa nga. Hato dei tang ma nga u briew uba bamsap? Lada nga bamsap, ai ba ka aiñ ka rai ïa kata bad ngam sngew eiei lada ki phasi ïa nga lada ka dei katkum ka aiñ hynrei ngan ym shah ba mano mano kin pynkylla ïa nga kum u langkñia,” u la bynrap.
Shuh shuh u Bah Iangrai u la kynnoh ba ka jingkem ïa u ka long shi bynta ka jingleh da ki katto katne kiba la donkti ha ka jingsiat ïa u Bah Cheristerfield.
“Ha ka 2 tarik Naiwieng 2022, haba nga la ïoh jingtip ba kin sa poi ha ïing jong nga, nga la hap ban rieh namar nga sheptieng ïoh kin leh ïa nga kumba la leh ïa u Bah Cheristerfield, namar ki dei kijuh ki briew kiba donkti ha kane ka jingjia,” u la ong.
Kumban shu pynkynmaw, la kem ïa u Bah Iangrai ha ka 2 tarik Naiwieng 2022 halor ka jingkynnoh pyndonkam bakla ïa ka pisa sorkar ïa kaba la mang na ka bynta ka jingtei ïa ka National Emergency Response System (NERS) Public Safety Answering Point (PSAP) ha Sadar Police Station Complex ha Shillong.
