SHILLONG :
U Myntri Rangbah ka jylla u Conrad Kongkal Sangma u la ong ka jingwanrah ïa ka skhim Prime Meghalaya ha kine ki lai snem ba la dep ka dei kaba la kynduh bad mad shibun ki jingeh bad la hap ban pynkylla ïa ka jingtrei jong ka khnang ba kiei kiei kin ïaid beit ïaid ryntih.
U Myntri Rangbah u la ong ba ka jingthmu jong ka Prime Meghalaya ka long ban ïarap ban plie lad plie lynti bad ban ïarap ïa ki nongseng kam lajong ba kin lah ban ïeng ha la ki jong ki kjat. U Myntri Rangbah ka jylla, u la ong ba ka jingdon jong ki nongshong shnong kiba lah ban trei kam lajong bad ban seng ïa ki kam jong ki kan ïarap shibun ïa ban kyntiew ïa ka ïoh ka kot jong ka jylla. U la ong ruh ba lada ka jylla ka kwah ban long kaba nyngkong napdeng ki jylla ba bun ha Ri India, kaei kaba donkam ka long ba ka jylla kadei ban don ki briew kiba trei bad kiba seng ïa ki kam lajong.
U la ong ba ka jingdon jong ki seng ba trei ïa la ki jong ki kam, kidei tang ma ki kiba lah ban kyntiew ïa ka ïoh ka kot hapoh ka jylla. U la ong ruh ba lyngba ka Prime Meghalaya ka sorkar jylla ka plie lut ïa baroh ki lad ki lynti, kynthup ïa ki lad ban ïoh ban seng ki kam lajong da ki briew shimet. U la ong ba ha Meghalaya ki briew ki kren shaphang ka jingkyrduh kam bad la pynsngew ba kane ka rukom pyrkhat kadei ka rukom pyrkhat khim jingmut. U la ong ba ki paidbah kim dei ba khmih ban ïoh kam tang na ka sorkar. Hynrei dei maki ruh ki don ka bynta kaba khraw ha kaba ai kam ruh ïa kiwei da kaba ki seng ïa la ki kam bapher bapher jong ki. U la ong ba ki nongseng kam kim dei ki nongwad kam hynrei kidei ki nongai kam. U la ong ba kane kadei ban long ka thong jong ki nongshong shnong.
Ïa kane u la kren ha ka jingïalang jong ka Prime Meghalaya kaba la pynlong ha State Convention, Shillong bad kumba katto katne ngut ki nongseng kam lajong ki la ïoh ka jingkyrshan pisa na ka sorkar jylla mynta ka sngi ba kin seng ïa ki kam ki jam lane ban pynheh ïa la ka kam jong ki. Ha kane ka sngi la pynbna ruh ba kito kiba la jop ha ki jingiakop jong ka Prime Meghalaya ki la ïoh T.50 lak khnang ba kin lah ban seng ïa ki kam ki jong ki bad kiwei kiwei ki la ïoh T.10 lak, T.5 lak, T.3 lak.
