SHILLONG:
Da ki phew hajar ngut ki paidbah khamtam kiba dang don ha ka jingngeit niam tynrai, ha ka 5 tarik Rymphang kila pyllong ïa ka jingkiew pyneh rngiew sha kliar u Lumsohpetbneng, ha Ri-Bhoi. Kane ka long kumba ju long shisien shi snem ba la pynbeit ka Seng Khasi.
Ha kane ka sngi, ki tymmen ki san jong ka Seng Khasi Kmie kin sdang ia ka jingleh niam ha khyrdop Lum Sohpetbneng, Umiam-khwan, G.S.Road ha ka por 7:30 mynstep bad ha ka duwan dupat ba kyntang, ha kliar jong u Lum ha ka por 11 baje mynstep bad la bud pat ïa ka jingsam ïa u khaw eh khaw shan bad ka um ksiar um rupa sha baroh ki nongwan. Ki don ruh ki jingkren pynshai na ki riew rangbah ka Seng Khasi ha ryngkat ka rwai ka shad tynrai. Ka Lum Sohpetbneng Komiti ka ia wer ia baroh ki khun ki ksiew jong u Hynñiewtrep Hynñiawwasa sha kane ka kiew pyneh rngiew pynksan rngiew ba shisien shisnem jong ka jaitbynriew.
Naduh ba la sdang ka kiew pyneh rngiew ha u snem 2000, ïa u khaw eh khaw kdang la ju ai da ka Syiemsad Hima Mawbuh ryngkat ka kyrkhu kyrdoh bad ba la nam ha ka dorbar ki longsan mansan Raij na ka kur Rangslang, Shylla, Manar bad Shadap. Katkum kane ka peit dak peit shin ka la paw ba ki blei ki ryngkew ki basa kin don ryngkat ban synran synriah ia u paidbyllien u ban wan u ban poi ha katei ka sngi da ka suk ka saiñ.
Ka kiew pynehrngiew lumsohpetbnang ka long ruh ka bynta jong ka Dorbar Raij Mawbuh ha ka Hima Mylliem ryngkat ka Seng Khasi Kmie ba la kitkhlieh bad pynïaid da ka Lyngwiar Korbarkam ne ka Lum Sohpetbneng Committee. Lah ban pynkynmaw ba ka Law Nongthroh ha syntai Lum Sohpetbneng ka dei kaba la lapdien da ki stadtip ka longbynriew manbynriew bad ka sengshnong sengthaw ba la lamkhmat da u Dr Marco Mitri ha kaba la shem ba don ki hynñiew tylli ki mawbah kur, ki mawbynna, bad byllai ki nongra marmaw bad marnar ba naduh mynnor ba la pyndonkam ki longshwa manshwa. Kumta ka don ka sakhi katkum ka stadtip ba mynta ban pynskhem ïa ka khanatang Sohpetbneng ha ka ba la ngeit ba ki khunbynriew Hynñiewtrep ki wan hiar na bneng na ka tangnub tangjri lyngba ka jingkieng ksiar Lum Sohpetbneng.
