SHILLONG:
U MLA ka 17 North-Shillong Constituency u Bah Adelbert Nongrum, u la kynnoh ba ka jingkam jong ki nongïalam ha ka sorkar Meghalaya Democratic Alliance (MDA) ba ka mat “Reservation Policy” ka dei ka mat kaba ktah lada pynbha biang ïa ka, ka long tang namar ba ki tieng ïa ka shuki kaba don ka jingbate hapdeng ka Khasi bad Garo Hills.
Haba ïakren bad u Kynjatshai, na ka liang u Bah Adelbert u la ong ba ka mat Reservation Policy ka dei ka mat ka ba u la ju khyllie man ka por, ym ba u la pynmih mynta tang namar ba la jan ka elekshon ym tang hapoh ka ïing dorbar thawaiñ hynrei wat shabar ruh.
“Halor kane ka mat ngam kwah ban wanrah ïa ka jingïapher jaitbynriew hynrei ka la dei ka por ban bishar bad ban pynthymmai ïa kane policy bad ka jingkwah ban pynïasoh jong nga sha ka Voice of People Party (VPP) ka long ban skhem ba ngin pynthymmai ïa kane, namar ba la 50 snem ngi la ïaid lynti bad kane ka policy ka la rim palat bad donkam ban pynthymmai ïa ka”, u la ong.
U la bynrap shuh shuh, “Kito ki briew ki ba la kdew hangne ban pynthymmai ïa ka Reservation Policy , ka dei ka mat ba long khia, hynrei ha ka jingshisha kane ka dei tang na ka bynta ka jingmyntoi jongki, ka dei ka mat ba khia ka shuki jong ki, namar ba ka don ka kam saiñ pyrthei ha ka jingbate shuki ïa ki, na Khasi bad Garo Hills, bad halor kane u paidbah um dei ban shah ïalam bakla”.
U Bah Adelbert u la ong ruh, “Ka la dei ka por ban bishar bad ban pynthymmai ïa kane bad ngin ap sa tang ka por ba u paidbah un ai ka jingjop ba kin bishar bha halor kane, bad hadien kane ngin sa ïoh ïa ka jingai jingmut bad ngin sa leh ïa kaba donkam”.
“Ngim kwah ban ïa khlad paralok na ki Garo hynrei lada i donkam ngin hap ban pynmih la ka sur ban dawa la ka jong ka jylla, kum ba ong u MP barim jong ka jylla u Purno Sangma, uba la kren halor ka Garo State, kane kam mut ba ngin pynlong mat elekshon hynrei ngi donkam, bad ngim kwah ba kano kano ka jaitbynriew kan duhnong hynrei ngi kwah ba ka jylla hi kan ïohnong”, u la bynrap shuh shuh.
