SHILLONG:
Ki EM In Charge ka Khasi Hills Autonomous District Council (KHADC) mynta ka 6 tarik Nohprah, 2023 ki la hiar ban khynra Trading bad Labour License ïa ki dukan jong ki bar jylla kiba don hapoh Ïewduh. Kane ka jingkhynra ka la jia hadien ba la mih ka jingujor na kawei ka seng ka ba la ai kyrteng kum ka Khun kynthei U Hynniewtrep Association.
Na ka liang ka Khun Kynthei U Hynniewtrep Association ka la phah da ka shithi kaba khlem kano kano ka jingsoi sha ka KHADC bad sha u Syiem ka Hima Mylliem ban ujor halor ka jingkynrei ki dukan bar jylla ki bym biang ka Trading License, ka jingbym don Labour License, ka jingpyniaid be-aiñ bad ka jingpyndonkam bakla ïa kawei ka Trading License na ka bynta ki ar lai tylli ki dukan bar jylla ha Ïewduh.
Na ka liang u EM In Charge ka Trade, u Bah Gigur Myrthong ha ryngkat ka jingsynran u Bah Fantin Lakadong, u Bah Gabriel Wahlang, u Syiem ka Hima Mylliem u Paiem Ainam Manik Syiem, ki ophisar ka KHADc bad ki pulit Enforcement ka KHADC, ki la leit ban khynra ïa ki kot ki sla na ki dukan ki bar jylla bad lap ba don na ki katto katne ki dukan ki bym biang ki kot ki sla. Kumta na ka liang ka Council ka la phah khang noh shwa ïa kine ki dukan bad ba kin bud ïa ki kyndon jong ka Council kum ba la buh.
Haba kren sha ki ladpathai khubor na ka liang u Bah Gigur Myrthong u la ïathuh ba kane ka jingkhynra la pynlong hadien ba la ïoh ïa ka jingujor na ka seng Khun Kynthei U Hynniewtrep Assiociation, hynrei kaba sngew sih ka long ba na ka liang kine ki dkhot kane ka Association ki khlem wan mih sha kane ka jaka.
“Wat la na ka liang ki dkhot kane ka Association ki khlem wan ban don lang ha kane ka jingkhynra laisen hynrei na ka liang ka Council ka la pynlong ïa ka jingkhynra license bad lap ba don na ki katto katne ki dukan bar jylla kim don ïa ki kot ki sla kiba biang bad don na ki, kiba khlem pynthymmai ïa ki license, kumta ngi bthah ïa ki, ba kin khang noh ïa ki dukan bad ban bud ïa ki kyndon ka Council” u la ong.
U la buh ruh ka jingkyntu ïa kano kano kano ka seng kaba wan ban ujor sha ka Council ba ki dei ban pynshisha ïa ka jingdon ka seng da kaba soi lane ai da ka mohor ka seng lane ba kin wan ban don lang namar lada ki phah ka jingujor khlem kano kano ka jingpynshisha ka Council kan ym treh shuh ban shim khia ïa kane.
Na ka liang u Bah Fantin Lakadong, u la kyntu ïa ki para khasi kiba don ïa ki dukan ha ïew ba ki dei ban kiar ban ai wai dukan sha ki bar jylla, bad ki dei ban ïaleh ban seng hi da ki dukan.
U Bah Gabriel Wahlang u la ïathuh ba ha kane ka jingleit khynra ïa ka license na ki dukan bar jylla ka Council ka la bthah ruh ïa ki trai dukan bar jylla ba ki dei ban buh uwei u nongïarap trai jylla ha ki dukan jong ki. Kane ka long ruh kum shi bynta ban ai kam aijam ïa ki khunsamla trai ri.
