SHILLONG:
Ka jingshong shah thngan jong u President rangbah jong ka Voice of the People Party (VPP), u Bah Ardent Miller Basaiawmoit ka la poi sha ka sngi kaba san, bad la ïohi ruh ba kane ka jingïakhih na ka nangpur bad suhthied ha kylleng ka ri Khasi Jaintia ha ryngkat ka jingkyrshan jong ki paidbah naduh ki longkmie longkpa, ki samla, ki sengbhalang bad wat ki tymmen ki kro ruh.
Kane ka jingïakhih kat nang mih ki sngi la ïohi ba ka nangïohbor da ka jingkyrshan ryntih jong ki paidbah, bad kiba bun ruh ki sengbhalang kiba la wan na kylleng ka ri Khasi Jaintia sha kane ka jaka shah thngan u Bah Ardent kaba la long ha parking lot ka Additional Secretariat, ban pynpaw ka jingkyrshan jong ki ïa ka mat jingdawa une u nongïalam ka VPP, kata ban pynbeit thymmai noh ïa ka bhah thungkam thungkam lane kata ka Reservation Policy.
Ha kane ka sngi, ka Confederation of Ribhoi People (CORP) ka la wan na Bhoi sha kane ka jaka ba shong shah thngan u Bah Ardent ban pynpaw ïa ka jingkyrshan jong ki. “Ngi sngewkhia ïa kane ka kam kaba pynlong ïa ngi ban wan ai jingkyrshan ïa u Bah Ardent, namar ka dei na ka bynta ki samla bad ka lawei ka jaitbynriew”, la ong u Bah Banari Ryntathiang, u ba dei u President ka CORP.
“Ka khubor ba ka CORP ka ai sha ka sorkar ka long kaba shai, ba ka sorkar ka dei ban pynbeit noh mardor ïa kane ka bhah thungkam ba ka jaitbynriew ka dawa”.
“Ko ki MLA Khasi kiba shong ha ka bos jong ka NPP, hiar noh na kato ka bos”, la ong une Bah Banari da kaba pynpaw ruh ba ka jingeh ïa ka jaitbynriew kan nangjur nangne sha khmat.
“Ngin nym kynran dien, hynrei ngin nang ïai bteng ïa ka jingïakhih jong ngi”, la ong shuh shuh une u President ka CORP.
U Pateng Myrsing, Vice President ka CORP, haba kren bad ki nongthoh khubor, u la ong ba na ka liang ka CORP ka wan ban ai jingkyrshan ïa u Bah Ardent namar ka jingleh kuman jong ka sorkar.
“Ko sorkar, wat sngap mynthi, namar lada phi sngap kumne ka jingïakhih kan sa pluh”, la ong u Bah Pateng. U la kyntu ruh ïa ka sorkar ba kan pynbeit noh ïa kane ka bhah thungkam thungjam bad ban ai da ka jingthoh sha u Bah Ardent, kata ban khot ïakren noh halor kane ka mat.
Une u nongïalam ka CORP u la maham ruh ïa ka sorkar ba lada ka bteng ïa ka jingleh kuman jong ka, kan pynlong da ka jingïakhih kaba tyngeh. “Na ka liang jong ngi, ngi la long kiba la pynkhreh wat ban ïa umsnam ruh, namar ka jingdonkam jong ka jaitbynriew”, la ong u Bah Pateng.
Ha kawei pat ka liang, u Bah Willstone Sohshang uba mih khmat ïa ki Khasi kiba shong ba sah ha West Khasi Hills District, u la pynpaw ba ka jingwan jong ki ban ai jingkyrshan ïa u Bah Ardent halor kane ka mat, ka dei namar ka jingkuman ka sorkar ban pynbeit ïa kane ka policy kaba la rim tam, kaba la neh sah kumjuh mynta la da ki 51 tylli ki snem.
“Ka dei ka policy kaba la rim tam bad donkam ban pynbeit thymmai katkum ka jingdawa jong ka por”, la ong u Bah Willstone.
Na ka liang u Bah Willstone u la pynshai ruh ba ka jingwan jong ki na West Khasi Hills District ka dei beit kum ki riew paidbah, ym na kano kano ka kynhun ne ka seng, hynrei ki wan kum ki paid Khasi kiba don ka jingsngewkhia na ka bynta ka ri bad ka jaitbynriew.
U la kyntu ruh ïa kiwei pat ki paid Khasi ha ka bri u Hynniewtrep ba kin klet shwa ïa kata ka jingsngewpher seng, lane kano kano ka jingsngew ïapher, hynrei ban kynmaw shwa mynta ba ngi dei ki Khasi ban ïakhun na ka bynta ki paid Khasi.
“Shim ïa kane ka sienjam kum ki Khasi ha kum kane ka khyllipmat”, la kyntu u Bah Willstone.
