NONGSTOIÑ:
Ka jingpang African Swine Fever (ASF) ka la ktah ha kawei na ki shnong hapoh Nongstoiñ ha kaba ki sniang jong uwei u nongri ki la ïap lut na ka daw jong katei ka jingpang.
Katkum ka jingïathuh jong u Dr. P. Sohlang A.H & Veterinary Officer u la ong ba katkum ka kaiphod ba la ïoh la ong ba katei ka jingjia ka la jia hapoh ka shnong Tiehsaw Nongstoiñ bad haduh mynta ki sniang kiba la ïap ki don haduh 22 tylli.
Shuh shuh u Dr. Sohlang u la ong ruh ba kitei ki 22 tylli ki sniang kiba la ïap ki dei hi jong utei u rangbah bad na ka liang jong ka tnad ka la bthah ïa utei u rangbah ba un pynkhuid bad sait bha noh ïa ka sem ha ka rukom kaba dei katkum ka jingbthah na ka tnad.
Na ka liang jong utei u Doctor u la ong ba haduh mynta ym shym pat la don ka dawai ban pynkoit ïa katei ka jingpang kumta ka lad jingïada kadei beit tang ban phikir ban kiar na ka jingpynïakynduh sniang thymmai lane ban wan briew ha ki sem sniang.
Ha kaba ïadei bad kane ka bynta na ka liang jong u Deputy Commissioner ka WKHD, u la phah pyrkhing bha ïa katei ka shnong da kaba pynjari ruh da ka kyndon 144 CrPC khnang ba kan nym don ka jingsaphriang sha kiwei pat ki bynta.
