SHILLONG:
U myntri rangbah ka sorkar jylla u Conrad K Sangma bad ka kynhun myntri mynta ka sngi ki la ïakynduh ïa u myntri ka sorkar pdeng uba dei khmih ïa ka tnad kam pohïing, u Amit Shah bad ki la batai bniah ïa ka jingjia kaba jia ha ka shnong Mukroh, West Jaiñtia Hills ha ka 22 tarik, Naiwieng 2022, ha kaba hynriew ngut ki mynsiem kiba kordor ki la duh lehnohei ïa la ka jong ka jingim.
Haba kren sha ki lad pathai khubor, u Conrad Sangma u la ïathuh ba ka sorkar jylla ka la kyrpad ïa u Amit Shah ba un kyntu ïa ki kynhun tohkit ba laitluid kum ka ‘CBI’ ne ka ‘NIA’ ba kan sdang ïa ka jingtohkit halor kane ka jingjia ha Mukroh. U la ong ‘khnang ba yn lah ban ai ïa ka jingbishar ba hok bad kito kiba donkti ha kane ka jingïasiat ki dei ban shah pynshitom katkum ka aiñ’.
U Conrad u la pynpaw ka jingsngewnguh ïa u Amit Shah ba u la kohnguh ïa ki jingkyrpad jong ka sorkar jylla. U la ïathuh ba ka sorkar Assam ruh ka la pan na ka sorkar pdeng ïa ka jingtohkit ba laitluid halor kane ka jingjia.
U Conrad u la ong ba ka jingkren kaba mih na u myntri rangbah ka Assam ka long ba kane ka jingjia kam dei kaba la pynshit, ‘hynrei ka dei ka jingleh palat ki pulit Assam’. U Conrad u la ong ruh ba ka sorkar Meghalaya ka la ïatai bad u Amit Shah shaphang ki daw kiba dei ki thied bah jong kane ka jingïakynad, kaba lah rben bha, ha kine ki thaiñ naduh ki por kiba mynshuwa bad kata ka dei ka jingïakajia khappud. “Kiba bun ki jingïakynad ki la jia naduh ka por mynshuwa haduh u pud ba kan da jia kum kane ha Mukroh,” la bynrap u Conrad.
“Na kata ka daw ka long kaba donkam ba ngin shim ïa ki sienjam kiba tyngeh khnang ba ngin lah ban pynbeit ïa kine ki jaka khappud junom. Kane ka jingjia ha Mukroh ka la pynthut bad ka la wanrah ïa ki diengpyngkiang ha ka jingïakren bad ka jylla Assam halor kane ka jingïapynbeit ïa ki jaka khappud. Dang don bun ki jaka kiba dang donkam ïa ka jingïoh ka jingkyrshan na ka sorkar pdeng khnang ba yn lah ban pynbeit shisyndon ïa kine ki jaka ïakajia ha khappud,” la ong u Conrad.
U Conrad u la ïathuh ba ka la don ka jingïakren bad u Amit Shah halor ka jingshongsuk jong ki paidbah ha kine ki jaka khappud. U la ong ba ka sorkar jylla ka la kyntu ïa ka sorkar pdeng ba kan khot ïa ka sorkar Assam bad ka sorkar Meghalaya ban ïakren halor ka shongsuk shongshngaiñ khnang ba kum kine ki jingjia kin ym jia shuh ha ki sngi ki ban dang wan.
U Conrad u la ong ba ka sorkar Meghalaya ka la ban jur bad ong ïa u Amit Shah ba kam dei ban don kano kano ka jingduna ha ka jingpyllait ïa ki marbam mardih kiba wan na ka jylla Assam ‘bad ka jingïatreilang jong ka sorkar Meghalaya bad ka sorkar Assam ka long kaba donkam’.
U la ïathuh ba la don ka jingïakren bad u Amit Shah halor ka jingkynthup ïa ka ktien Khasi bad Garo ha ka khyrnit ba phra jong ka riti synshar ka ri nangta ka jingpyntreikam ïa ka ILP bad ban shah ïa ka sorkar jylla ba kan ïaid shakhmat ban pyntreikam ïa ka aiñ MRSSA.
