SHILLONG:
U President ka Hynñiewtrep Youth Council u bah Robertjune Kharjahrin u ther tyngeh ïa ka sorkar halor ka jingai jem jong ka haba ïadei bad ka jingpynkynriah ïa ki briew kiba shong ha Them Metor.
U bah Robertjune u la ong ba kane ka dei ka mat kaba la kham slem, ha kaba na ka liang jong seng kala khmih lynti ba ka sorkar MDA-I ka la dei ban pyndep ïa ka.
“Ngin ym lah ban len ba kawei ka daw kaba la pynsuki noh ka dei na ka daw jong ka jingshahteng bad ka jingdang don jong kato katne ki Mukotduma kiba dang sahteng ha High Court bad ha kiwei ki kashari,” u la ong.
Lada ngi peit ïa ka History jong kane ka kam, ha ki por kiba la dep ruh kala don ka jingïatyngkhuh hapoh ka ïingkashari haba ïadei bad kane ka kam, namar ki ki briew kiba shong hangto, ngim tip da kano ka jingmut ki kam ba kato ka khyndew ka dei ka jong ki.
Na ka liang u President ka HYC u la buh jing kylli ïa ka sorkar da kaba ong, “Kumno ki nongtrei sorkar ne ki nongtrei jong ka Shillong Municipal Board kin kam ba ki Quarter jong ka SMB ka dei ka jong ki? Hato kato ka khyndew ka dei shisha ne em jong ka sorkar bad kata ka Quarter kaba ka SMB ka shna ki shna ha khyndew jongno? Lada ki shna ha ka Khyndew jong ka SMB kumno kine ki briew kiba trei hapoh jong ka kin ong ba kine ki quarter ki dei ki jong ki.”
Haba
ïadei bad ka jingkren jong ki nongïalam ka sorkar naduh ki sorkar kiba la dep bad ka sorkar ba mynta, ki ong ba kane ka jaka ka don ar, lai bynta, ki don ki bynta kiba dei jong ka SMB, ki don ki bynta kiba hap hapoh ka Hima Mylliem, bad kine ki jaka kiba hap hapoh ka Hima Mylliem ka Hima kala aiti noh sha ka Sorkar da kaba ïasoi ïa ka Soskular, ym ban pynshong briew hynrei ban wan rah ïa kiwei ki jingmyntoi lyngba ki Shopping Mall, ki jaka ïeng kali bad ki wei ki wei.
“Lada ka jaka ka dei jong ka SMB, ne ka jaka kadei jong ka Hima Mylliem kan eh aiu ïa ka sorkar ban pynkut noh ïa ka jingïakren bad ban ïaid beit da kaba weng beit ïa ki,” ong u bah Kharjahrin.
U la bynrap da kaba ong, “Lada ka dei ka jaka jong ka SMB ne lada ka dei jong ka Hima Mylliem kan eh aiu namar ka Hima Mylliem kala dep ïasoi bad ka Sorkar bad ka jaka ka la dei hi jong ka sorkar. Kaba don kam mynta ïa kasorkar ka dei ban leit shimti noh ïa kato ka jaka bad lada don ki briew kiba trei ha ki tnat sorkar lada ki pynwit kala don te ki aiñ kiba hap ban pynkynriah ïa ki na ki jaka sorkar.”
“Kumno ngin batai aiñ ma ngi ïa ka sorkar. Kat kum ka jingsngew thuh jong ngi, ka jinglong trai ïa kato ka jaka ka lashai namar shi bynta ka dei jong ka SMB bad shibynta ka dei jong ka Hima Mylliem. Na ka liang ka Hma mylliem ka la dep ban aiti sha ka sorkar bad kala long ka jaka sorkar, bad dei ban shimti noh ïa kane ka jaka,” u la ong.
U la bynrap da kaba ong Kumba ki leh ha Umsawli, kumba ki leh ha syndah Umïam ïa kito ki nongtrei kiba dei ki Khasi , kumjuh dei ban leh, lada ïa ki Khasi phi lah ban beh kumno ïa ki bar jylla phi ïakren ban ai ïing saw san mala.
” Ka jingkhot ïakren ïa ki, ka long thik kumba ki khot ïakren bad ki trai Jaka, hynrei maki kim dei ki trai Jaka. Ha ka wei ka lynti ka sorkar ka shim kumba ka dei ka jaka jong ki, ha ka wei pat ka lynti ka jingkhot ïakren ka long kumba ka dei kaei kaei, lada ki dei ki nongtrei jong phi kan eh aiu ban pynkylla ïa ki nongtrei lajong, Kumno da ki nongtrei sorkar kin dawa ïa ka sorkar ban ai ïing paki dulan ïa ki,” ong u President ka HYC.
U la bynrap ruh da kaba ong, ” Ngam pat ju ïohi ba don ki nongtrei sorkar haei haei ruh em ban dawa ïa kata, wat ki IAS haba ki pan jaka na ka sorkar ki da thied ki khlem pan ei kumba pan ki Briew kiba shong ha Them Metor.”
” Ïa kiwei ki nongtrei sorkar ki ai tang ka bai ïing lait noh ïa ki ophisar ki ai da ka Quarter, ki ba bun ki nongtrei sorkar ki ïoh tang ka bai ïing bad ki hap ban wat hi ka ïing ban sah wai, kan ei aiu ïa kine, hato kine ki dei ki khun khatduh ne ki dei ki khun pyrsa jong no kiba long Myntri sorkar kaba hap ban ai special haduh katne,” u la bynrap.
U bah Kharjahrin u la ong ba ka sorkar ka dei ban pyndon kam da ki aiñ ban pynkynriah ïa ki bad lada ka sorkar kam lah ban pynkynriah ïa kiba shong beaiñ shah noh ïa baroh ban shong ha ki jaka sorkar, ka jingleh jong ka sorkar ka ap jingma ban khot ïakren bad ki briew kiba shong beaiñ bad khot ïakren bad ki nongtrei jong ki.
Na ka liang ka seng ka kyntu ïa ka sorkar ba kan pynkloi ïa kane ka kam bad kumno kan leh ka seng ka ieh ha ka jingstad jong ka sorkar.
