SHILLONG:
Ka Shad Nongkrem kaba ju pyndep ryngkat ka niam ka rukom bad ka kñia ka khriam ka la kut mynta ka sngi ha madan shad ha phyllaw ka ïing Sad ha Smit.
Ha kane ka sngi, u Myntri Rangbah ka jylla u Conrad K Sangma u la wan ban sakhi lang ïa ka Shad bad u la pynbna ba ka sorkar ka la mang T. 2 klur na bynta ban pynbha, ban pynjanai shuh ia ka Shad ka Hima Khyriem.
Haba kren sha ki lad pathai khubor, u Myntri Rangbah u la ong ba ki tamasa bad ki kolshor ki dei matti ban pynithuh ia ka jinglong tynrai jong ka jaitbynriew bad ka donkam ban pynneh ban pynsah bad iada.
“Nga sngew kmen ban iohi ba ngim shym la pynduh pyndam ia ki kolshor ki jong ngi bad nga ai mynsiem ba ngim dei ban pynneh pynsah bad ban kyntiew ym tang iaka Shad Nongkrem hynrei ia baroh ki tamasa jong ki jaidbynriew kiba don hapoh ka jylla”, la ong u Myntri Rangbah.
U la ong ba ka sorkar jylla kan pynthikna ban iarap pisa man ka por ia ka Shad Nongkrem ha ki snem ban wan ba kan nang khring ym tang ia ki paidbah ka jylla hynrei wat ia ki briew bad ki nongwankai sngewbha.
Ha kajuh ka por, u Syiem ka Hima Khyrim u Paiem Balajied Sing Syiem ula ong ba ka Shad mynta u snem ka long kaba heh bha hadien ar snem ba la dep na ka jingwan syllad u Covid-19.Ki don kumba 300 ngut ki nongshad kynthei bad shynrang kiba la iashim bynta ha kane ka sngi kut kiba wan na kylleng ki jaka.
U la ong ba katkum ki dak ki shin ha ka jingleh ia ka niam ka rukom, la shem ruh ba ki long kiba bha.
Kiba wan sakhi lang ha kane ka sngi ki long u Lamphang ka iingdorbar Thawaiñ ka jylla u Bah Metbah Lyngdoh, ki Myntri ka Sorkar Jylla kiba kynthup ia u Bah Sanbor Shullai, Bah Renikton Lyngdoh Tongkhar, Bah Banteidor Lyngdoh bad u Bah Dasakhiat Lamare, u Chief Executive Member (CEM) ka KHADC u Bah TW Chyne, ki MLA, MDC bad kiwei kiwei.
