SHILLONG:
Ka Hills Farmer’s Union (HFU) Mawlai Circle ka la leit ban ai da ka dorkhas ha ka Myntri ka tnad ka rep ka rïang ka sorkar jylla, ka Dr. Ampareen Lyngdoh halor ka jingshah ot kilo kaba la ktah ïa ki nongrep haduh katta katta.
Haba kren sha ki lad pathai khubor, u President ka HFU Mawlai Circle u Bah Comingstar Kharumlong u la ong ba na ka por sha ka por na ka lïang ki nongrep ki ju pynsngew ïa kane ka mat kaba ktah shikatdei ïa ki bad ki kwah ba ka sorkar kan thaw da ki lad ki lynti ban pyllait na kane ka jingot kilo ïa ki mar-rep.
“Naduh u snem 2018 ter ter bad ba ka sorkar kan shna noh ïa kano kano ka aiñ lane pynrung noh ha kano kano ka kyndon aiñ ha kaba ïadei bad ka jingot kilo ki mar rep. Mynta la 5 snem kane ka jingïakren kam poi shaei shaei”, la ong u Bah Comingstar.
Ha kaba ïadei bad ka jingai jingïarap na ka lïang ka sorkar, u Bah Comingstar u la ong, “Wat lada na ka lïang jong ka sorkar ka la ai shibun ki jingïarap hynrei kam lah ban weng ïa katei ka jingeh kaba ki nongrep ki ïakynduh. Ki nongkhaïi haba ki shim ïa ki mar rep kim ju kylli ba kin ot ïa ki mar bad haba ki nongrep ki wan ban die ki shu shim beit ïa ki mar, ki kheiñ bad ki shu khate 10% na ki mar rep bad ka jingsiew ruh kam long shuh 100% hynrei ka la long noh tang 90% bad kane ka la long kum ka kam tuh namar la shim khlem ka jingïamynjur lang. Lada u nongrep um ai bad lada u nongrep u ïeng pyrshah ban nym shah ban ot kilo hynrei kaei kaba mih na ki, ki ong ba lada phim ai, ngim thied ïa ki mar jong phi, kata ka la long kaei kaei kaba shu leh da ka bor.
U Bah Comingstar u la ïathuh ba ha ka 3 tarik Jymmang 2023 ha ka por 8 shiteng mynstep na ka liang kane ka myntri ka tnad ka rep ka riang, kan leit hi dalade ban jngoh bad wad ïa kaba jingshisha sha Ïew ha kaba ïadei bad ka jingshah ot kilo ki mar rep.
Kane ka jingeh jong ki nongrep kamdei tang mynta hynrei na ka por sha ka por bad bad na ka liang ka seng HFU, ka la leit pynsngew ïa kane ka jingeh ym tang ha Secretariat hynrei ka la leit ruh sha ka District Council hapoh u Syiem ïa kane ka jingeh kaba ki nongrep ki ïakynduh.
Na ka liang kane ka seng HFU ka la ai por shibnai ïa ka sorkar ban pynurlong ïa ka jingdawa jong ki bad lada ka sorkar kam lah ban leh eiei halor kane ka jingeh jong ki nongrep, na ka liang ka seng kam banse ban mih sha madan.
