JOWAI:
Ki lynti harud surok jong ka sor Jowai ba la mang na bynta ka jingïaid kjat jong ki paidbah nongleit nongwan ki la dap mam da ki nongshong die dukan ki ba la pyndonkam ïa kine ki jaka kum ka jaka die jingdie jong ki ha kaba ki die ïa ki jhur, ki soh bad ki jaiñ second hand.
La ïohi ba ki khynnah pule bad ki riew paidbah ki hap ban ïaid lyngba ki surok bah namar ba ki jaka ïaid ba la mang, la pyndonkam da ki riew paidbah ban die jingdie. Kane ka la pynlong ïa ki nongñiah kali ban hap da husiar bha khnang ban lait na kano kano ka jingmynsaw. Kane ka la lam sha ka jingdheng kali kaba jur bha ha kine ki thaiñ.
Lah ban kdew ba ki ïew ha sor Jowai ki don bun tylli ba kynthup ïa ka ïaw chor, ïaw shyiap bad ka ïaw thymme, hynrei ki jingeh ki long ba kine ki ïew ki la khapngiah.
Shuh shuh na ka liang ka bor ba dei khmih ki la pyrshang ban tehsong ïa kine ki nongdie madan hynrei kam shym lah ban weng na ka jingshlei ki nongdie jingdie ha ki lynti ïaid ki paidbah.
Ka long kaba i donkam ïa ka bor ba dei khmih ban shimkhia noh halor kine ki jingeh, khnang ba ki paidbah ki ba imsngi bad ki ba leit ba wan la ka kam kin ïoh ban trei ban ktah la ka kam jong ki.
Lah ban kdew ba hapoh sor Jowai, ka Ïawmusiang ka dang don hapdeng ka jingtei ïa ka complex. Katba ka Jaiñtia Hills Autonomous District Council (JHADC) kaba dei peit kam shym la lah ban tei pyndep ïa ka Ïawmusiang kaba la thmu ban pyndep naduh u snem 2001-02 hapoh ka jingsynñiang jong ka DoNER.
Ka la don ki jingeh ha ka ban pyndep ïa kane ka ïew namar ki don ki daw saiñ pyrthei bad kiwei kiwei. Shuh shuh lah ban ong ba ka jingjlan ban tei pyndep ïa kane ka ïew ka long ka dawbah ba ki nongep bad ki ba kamai imsngi na ki kam die jingdie bad kumjuh ruh ki longkmie ki hap ban pyndonkam ïa ka lynti ïaid kjat harud surok kum ki jaka die jingdie jong ki khnang ban ïoh ban bylla ban sngi bad ban trei ban ktah la ki kam ki jam jong ki.
