SHILLONG:
U Symbud Myntri rangbah ka jylla, u Bah Prestone Tynsong u la kyntait ïa ka jingkynnoh u CEM barim ka KHADC u Bah Titosstarwell Chyne halor ka jingshah weng jong u, na ka shuki CEM, da ka ba ong ngam dei u dkhot ne u MDC ka KHADC kumno ngan pynkkhyllem ïa ka Executive Committee ba la ïalam da u Bah Titos?
Haba kren sha ki ladpathai khubor, na ka liang u Bah Prestone u la ong “Ngam dei u dkhot ka KHADC bad ngam dei u MDC te kumno ka UDP kan kynnoh ïa nga ba nga donkti ban pynkylla ïa ka saiñpyrthei hapoh ka KHADC? Sngew bha kylli na ka UDP ba kumno u Bah Prestone u lah ban pynkylla ïa ka Executive Committee ha ka KHADC?”.
Ha ba kylli halor ka jingkynnoh u Bah Titosstarwell Chyne , ba ka PDF ka la buh ïa ka kyndon ba lada ki kwah ba ka PDF kan ïasoh bad ka NPP ki dei ban kynjat ïa u nongïalam ka UDP na ka shuki CEM, u la ong “Kane ka dei ka jingkynthoh ka ba mih na ki jingsngew bitar uno uno u nongïalam haba u mad ïa kum kane ka jingjia, ka ju pynlong ba un kren kulmar kumne ban shu kynnoh ïa ki wei” .
“Ka lah ban long ruh ba ym shem la lah ban pdiang ïa la ki jong ki jingbakla ki ba u la leh bad long kum u briew u ba la rem ha ka election, um ju kam ba u rem election namar ba u la leh bakla hynrei kin kynnoh beit ïa kiwei, ba u la pynlut pisa lane kumne kumtai te kane ka dei ka ba ngi ju don hangne”, u la ong.
Ha ba kylli halor ka jingkylla ka saiñpyrthei ha ka sorkar jylla, u Bah Prestone u la ong “Nga la dep ong ba ka jinglong jingman mynta, ngi ïa long tylli lang bad ngin ïa treilang haduh ban da kut ka samoi treikam kata naduh u snem 2023 haduh u snem 2028 kum ba ka long”.
Halor ka jingtyrwa u nongïalam ka Congress ïa ka NPP ba kan kynjat ïa ka BJP, khnang ba ka Congress kan ïoh ban ïatreilang bad ka NPP , u la ong “Ngam kwah ban ong eiei halor kane ka jingong ban kynjat ïa ka BJP khnang ba ka Congress kan ïoh ban trei lang bad ka NPP, kum ba ka long mynta ka jingpynbeit ka ba la dep leh ha ka MDA II bad kan bteng beit haduh da kut kane ka samoi treikam jong ka”.
Ha ka ba ïadei bad u MDC shu sieh, u Bah Bindo M Lanong, u Bah Prestone u la ong “Ngam lah ban jubab ma nga namar ba ka shong ha ka EC thymmai jong ka KHADC bad kumba ka long mynta ym pat don kano kano ka jingtyrwa ka ba la phah sha ka sorkar ngam pat lah ban ong eiei halor kane”.
