SHILLONG:
Ka Enforcement Wing jong ka Khasi Hills Autonomous District Council (KHADC) ha kla 20 tarik Ïaïong ka la hiar ban khynra ïa ki dukan ha kylleng jong ka Them Iew Mawlong bad kiwei de ki jaka ban khynra ïa ka Trading Licence ki bar jylla.
Kane ka jingleit khynra jong ka KHADC ïa ki Trading Licence ka long ba kine ki nongshong dukan ki khlem pynthymmai ïa ki Licence naduh u snem 2015. La sdang ïa kane ka jingkynra Licence, naduh Stand Sohra ter ter shaduh shajan Motphran.
Lah ban kdew ba ha kane ka jingleit khynra Trading Licence la lap ba bun ki bym biang ki kot ki sla.
Haba kren sha ki lad pathai khubor u Chief Executive Member (CEM) ka KHADC u Bah Titostarwell Chyne u la ong ba ka jingïohlad ki bar jylla ban shong dukan be-aiñ khlem da don ki Trading Licence kadei namar ka jingtlot ka Enforcement jong ka KHADC.
U Bah Titos u la ong, “Nga i ïa ka jingisaitmet jong ka jingdon jong kine ki briew kiba nabar kiba shu wan ban die madan hapoh u pud u sam jong ka Iewduh. Na ka liang jong nga, nga la wan ban ïalam ïa ki Enforment ban khang syndon ïa kine ki briew bad kidei tang ki nongshong madan, ki bym don ki kot ki sla kiba biang. Na ka liang jong nga, nga la bthah ïa ki briew ba kim dei ban shong biang ha kine ki madan.
U la ong ba ha ka jingleit khynra la lap ïa shibun ki dukan ki bym don ki Trading Licence, “Lehse mynta ka sngi, ngin nym lah ban khang syndet ïa ki hynrei ki don ki bynta ba hap ban leh, ban pan jingpynshai na ki bad hadien kata ngin hap ban khang syndon ïa kito ki dukan ki bym don ïa ka Trading Licence”.
U Bah Titos u la ong ba ym lah ban kdew kti ïano ïano hynrei ïa mynta ngin shim ka jingkitkhlieh naduh u Syiem ka Hima Mylliem, Myntri, kumjuh ki Enforcement ba kidei ban pyndonkam hok ïa ka kam kaba ki trei. “Ym dei ba tang shu ïoh kam ka la biang, bad ka jingmut jong kane ka enforcement ka long ban pyntreikam hok ïa ka aiñ, ‘Trading by Non-Tribals’ ha kaba ym ailad ïa ki bar jylla ban shu wan ban khaïi pateng sha ka Ri jong ngi, khlem da ïoh ïa ki Trading Licence”.
U Bah Titos u la ong, “Ka nongrim jong ka Executive Committee (EC) ka long ban pynthikna ba ki dei ban don Trading Licence, hynrei ngim kwah pat ba uwei pa uwei u bar jylla lane u briew ba nabar un ïoh Trading Licence, hynrei ka jingmut ka long tang ban pynduna”.
U la ong ba hadien bun snem la ïohi ba kine ki madan, ki dukan, kiba ju shong da ki bar jylla hynrei ka long kaba sngewtynnad pat ban ïohi ba ki paradoh parasnam ba ki ïoh ban shong ha kyndong kynshrot.
U Bah Titos u la pynpaw ïa ka jingisynei ïa ki paradoh parasnam kiba shong die madan bad u kyntu ïa ki paidbah ba kimdei ban sngewwit ïa ki, namar ka pyrthei mynta ka long kaba tan bad hiran.
Ha kaba ïadei bad ka jingbym don Trading Licence kine ki bar jylla, u Bah Titos u la ong, “Ngam lah ban bah suloi khlem da don Licence, lane ngam lah ban ñiah kali kamai khlem ka Permit, kane ka kam khaïi ruh ka long kumjuh. Ki briew kiba nabar kim lah ban trei lane khaïi khlem pat ïoh Trading Licence bad kane ka long kaba be-aiñ”.
U Bah Titos u la ong ba na ka liang ka jong u bad ki myntri kin nym shah ïa kine ki bar jylla ban shong die dukan khlem Trading Licence bad pynthikna ruh ba kin nym ïoh ïa kane Trading Licence namar ki la dep ban pynkheiñ ïa ka aiñ.
Na ka liang u CEM u la buh ka jingkylli na u Syiem ka Hima Mylliem ban pynthikna ba ki ba shong hapoh Iewduh ruh ki don ne em ïa ka Trading Licence bad ïa kane na ka liang u CEM un ailad ïa u Syiem bad ka Hima ban tuklar halor kane.
“Hapoh shitaïew yn ai ïa ka kaiphod sha u bad ban pynthikna ba uwei u bar jylla un nym ïoh shuh ban shong dukan ha madan lait noh ïa kito kiba don ki Trading Licecne bad kiba la shong dukan la slem”.
Ha kane ka jingkynra Trading Licence la don lang ryngkat u EM ka tnad khaïi (trade) u Bah Rangkynsai Kharbuki, ka EM ba peit ïa ka tnad khaïi ka Kong Grace Kharpuri, u Syiem ka Hima Mylliem u Bah Ainam Syiem lem bad kiwei.
