NONGSTOIÑ:
Ka jingsaphriang ki dur bad video ha ki rynsan social media halor ka jingïalehkai kmen Khrismas jong ka Balang Presbyterian Nongpyndeng ha ka 27 tarik u Nohprah ka la pynlyngngoh bad pynkyndit ïa kiba bun ki briew namar kila ïohi ïa ka jingriam dur bula bala riam ima bad ikynsha bha ïa kaba la ju tip ruh ïa ki kum kita ki “JUHE” kiba la ïaid paidbah ruh ha surok ka sor Nongstoiñ.
Kane kala pynlong ruh ïa kiba bun ki paidbah ban kynthoh halor katei ka jingïalehkai Khrismas jong ka Balang Presbyterian Nongpyndeng bad bun ruh kiba la kylli ba kaei ka jingmut ba ki hap ban ïa riam kynsha bad phong dur bula ksuid ïalade bad kala don ruh ka jingiatai nia kaba shyrkhei bha halor kane ka bynta ha ki rynsan jong ki social media.
Haba phai sha West Khasi Hills District lehse kane ka jinglehkai Khrismas bad ïariam dur bula JUHE kamdei shuh kaba dang thymmai bad bun hi kiba la ju ïohi bad ïa tip bha namar ym tang ha Nongpyndeng hynrei don bun ki shnong ha WKH kiba ju ïalehkai kum kine ki jait jingïalehkai ha shwa ban ïa bam khana Khismas lane ban ïalehkai kmen Khrismas bad kaba la neh ruh la bun bun snem mynta hynrei don ki shnong kiba la sangeh bad don pat kiba dang ïai bteng haduh mynta mynne.
Hynrei haba phai pat halor ki jingsaphriang ki dur bad video ba i kynsha na kaba kum katei ka jingïalehkai jong ka Balang Presbyterian Nongpyndeng na ka liang jong u nongthoh khubor u la pyrshang ban ïakren bad ki katto katne ki nongïalam Balang ba kin pynshai kham bniah halor katei ka jingïalehkai Khrismas ka jong ki namar kila bun sa tang ki dak jingkylli na ki paidbah ba bun Balang.
Na ka liang jong u Tymmenbasan S. Syiem u la ong ba ka jingmih jong ki JUHE ngi kheiñ ïa ki ba kidei ki shispai u soitan u syiem ka jingdum te haba ka wan ka gospel ba wan u Jisu Khrist ha kane ka pyrthei ki ïaleh pyrshah ïa ka jingshai jong ka Gospel bad halor ka jingleit ïaid sha surok ka sor Nongstoiñ u la pynshai da kaba ong ba kadei ka jingleit pyni hadien bala kut ka jingïalehkai Khristmas hynrei kam don ei ei.
U la ong ruh ba ka jingthmu jong kitei ki JUHE ki long kum ki shipai u soitan bad hangno hangno ba ka Gospel ka leit ka Gospel u Jisu Khrist ka rung kine ruh ki wan ban ïaleh pyrshah, kumta haba ïaleh Khrismas ha ka sngi jong ka jingwan longbriew jong u Trai Jisu, ngi shem ba une u soitan ruh u wan ban ïaleh pyrshah kumta haba ngi ïalehkai drama lane ïa shad Khristmas ngi shim ïa ki shipai JUHE ba ka long kawei na ki subjek kiba ba khmat ba ka jingshai bad ka jingdum ki wan ban ïaleh pyrshah.
“Ki shipai khlaw kidei ki JUHE bad ki shipai Khristan kidei kito ki khynnah kiba ïaleh drill bad ki JUHE ki leh donbor ki pynsheptieng ki pynkhynñiuh khamtam ïa kito ki ba dang rit ka jingngeit hynrei ha ka kyrteng u Jisu Khrist la ki kiengatiar kiba katno kaba i shyrkhei lada peit hynrei yn da haba u khynnah u barit u siat ha ka kyrteng u Jisu Khrist ki kyllon kram” ong u Tymmenbasan.
U la ïathuh ruh ba naduh ka snem bala long ka Balang naduh ba ka Nongpyndeng ka don ha ka Nongstoiñ kamut kaba dang dei ka tnad 1956 la sdang ïa ka Khristmas bad hadien kata ka snem ka don ka por bala kham ïa sangeh noh hynrei ka dang wan thymmai biang naduh ka snem 71 ter ter bad man ba ïaleh Khristmas ki don beit ki tei ki JUHE.
