NONGSTOIN:
Ka Seng Federation of Khasi Jaintia & Garo People (FKJGP) Mawshynrut Circle, mynta ka sngi kala leit ban ïakynduh ïa u DC ban pan jingshai halor ka jingbym pat treikam pura ka Civil Sub Division bad kumjuh ka Shallang C&RD Block kaba dang shu plei thymmai ha u snem bala lah.
U samla Eveningstar Marthong General Secretary FKJGP Mawshynrut circle haba kren sha ki lad pathai khubor u la ong ba ka jingplie ïa ka Mawshynrut Civil Sub- Division kala jan kynjoh mynta sha ka 7 snem hynrei haba phai pat ha ka liang ka jingdon jong ki tnad sorkar bapher bapher la sakhi ba kiba bun ki dang hap ban treikam beit napoh Nongstoin.
Shuh shuh u la ong ruh ba na ka liang jong ka Seng aiti ruh ïa ka dorkhas ban dawa pyntreikam pura noh ïa ki tnad kum ka Election, ka SDSEO ophis, ka tnad Registration, ka Treasury bad kiwei kiwei hapoh katei ka Sub Division khnang ba yn lah ban weng ïa ka jingeh ba ki paidbah.
Ka seng kala kyntu ruh ïa MLA ka thaiñ ba un shimkhia na ka bynta ban pynurlong ïa kitei ki mat jingdonkam jong u paidbah ka thaiñ.
