SHILLONG:
Ha ka 7 tarik Nohprah kaba dei ka sngi rakhe pyndonburom ïa ka jingdap 28 snem ka lyngkhuh sngi ïap u rangbah Bull N Lyngdoh uba dei uwei na ki radbah jong ka Khasi Students Union (KSU), la pynlong ïa ka jingbuh syntiew burom ha khmat u mot sah jingkynmaw, ha lynti Malki ha ka jingïadon bynta lang ki bahaïing bahasem, ka para trai jong u Bah Bull, ki nongïalam ka KSU, ki dkhot na ki circle bapher bapher hapoh ka jingïalam u President rangbah ka seng u Bah Lambokstarwell Marngar.
Haba kren ha kane ka sngi, u President Rangbah ka seng u la ong, “Bun ki jingtyrha bad ki jingeh ba ka jaidbynriew ka kynduh. Ngi dang pyrkhat ba ka jingpynbeit ïa u pud u sam yn thoh da ka sia hynrei la sakhi pynban ba la hap ban thoh da ka snam briew hadien ka jingjia ha Mukroh. Kane ka wan lap ïa ka jaidbynriew jong ngi, namar ki nongialam jong ngi kiba ngi la jied ban ïada bad ïatai na bynta ka jaidbynriew pynban ki dang bunkam ban leh da kiwei pat ki kam ki bym iadei dur bad ka jingtei ïa ka jylla bad ka jaidbynriew.
U la ong ruh ba mynba u Bah Bull u dang long u nongïalam, kiba bun ki kynthoh ba udei u nongïalam uba kwah tang ban pynkulmar shnong bad ban thaw ïa ki jingkulmar, hynrei kine ki juh ki thylliej mynta pat ki ong ba ym don nongïalam shuh kat une u Rangbah.
Kumta u la kyntu ïa ki samla ba katba dang khlaiñ ka bor met ka bor pyrkhat kidei ban wan shakhmat ban ai jingmut bad ban buddien ïa ka lynti ba la prat da une u rangbah ym tang ban shu kynthoh.
