SHILLONG:
Ki dkhot ka Khasi Student Union, mynta ka sngi ka 22 tarik, Naiwieng 2023, ka la kynmaw burom ïa ka lyngkhuh dap shisnem jong ka jingshah siatïap ki 5 ngut ki rangbah Khasi ha ka shnong Mukroh, West Jaintia Hills ha ka ktang suloi ki Pulit Assam.
Ki dkhot ka Khasi Student Union mynta ka sngi ki la teh ïa ki baner ha ki katto katne ki bynta ka nongbah Shillong kaba kynthup ha Secretariat, Mot Kiang Nangbah, ha Khyndailad, Motphran, Laitumkhrah bad Golf Links ban kynmaw burom ïa ki san ngut ki khasi ha ka shnong Mukroh. Lah ban kdew hangne ba ha ka 22 tarik u Naiwieng 2022, ki pulit ka Forest Protection Force ka Assam ki la siat ïap ïa ki 5 ngut ki nongshong shnong ka jylla Meghalaya ha ka shnong Mukroh .
Halor kane ka jingjia na ka liang ka Sorkar Assam bad ka Sorkar Meghalaya ha ka 30 tarik Nailar 2023, ha ka jingïalang kaba la long ha Guwahati la shim ïa ka rai ban pynkut noh ïa ka jingtohkit jong ka Judicial Commission jong ki ar jylla bad yn sa aiti noh shen ha ka CBI ba kan tohkit halor kane ka jingjia.
Ha ka 16 tarik Naiwieng 2023, na ka liang u Myntri Rangbah ka jylla u Conrad K Sangma u la ïathuh ba halor ka jingjia shah siatïap ha Mukroh na ka liang ka Sorkar Assam bad Sorkar Meghalaya ki la ïaid shaid shaid ban aiti noh sha ka kynhun tohkit ka CBI.
