SHILLONG:
Ki dkhot ka Khasi Student Union (KSU) ha ka 7 tarik Nohprah 2023 ki la pynlong ïa ka jingïalang ban kynmaw burom ïa ka lyngkhuh sngi ïap ba 29 jong u President barim ka Seng u Bah Bull N Lyngdoh.
Mynta ka sngi ka seng ka la pynlong da ka program bad buh syntiew ïa u mot sah nam jong u bah Bull N Lyngdoh ha Malki, Shillong, ha ka jingïadon lang ki bahaïing u bah Bull Lyngdoh bad ki dkhot ka KSU.
Haba kren ha kane ka sngi na ka liang u General Secretary ka KSU u Bah Donal V Thabah, haba kynmaw burom ïa u bah Bull N Lyngdoh u la ong ba kum u nongïalam u Bah Bull u la shim shi bun ki sienjam ban pynthikna ïa ka jingshngaiñ jong ka Ri bad ka jaitbynriew.
“Ha u snem 1987 ha ka jingïakhih pyrshah ki Nepali bad ha u snem 1989 ka jingïakhih ban pyrshah ka jingthmu ban wanrah ia ka lynti rel hapoh Khasi Jaintia, u Bah Bull u la mad shi bun ki jingshah pynshitom naka bor ka aiñ haduh ba ka met jong u ka la khrew lut” u la ong.
“Hynrei u la shah shitom namar u tip ba kaei ka ba u leh ka long wanrah ka jingshngaiñ na ka bynta ka lawei ban wan, lada u Bah Bull ym ïakhun ha kato ka por bun na ki shnong khasi kum ka Mawlai, Mawprem bad Nongmynsong ka la kylla sha ki shnong Nepali” u la bynrap.
U Bah Bull u la shim ïa ka sien jam ban ïakhih da ka jingïakhih ka ba neh da ki snem haduh ba ki Nepali ki hap ban phet na ki shnong Khasi”.
Na ka liang u Bah Donal V Thabah, u la kyntu ïa ki para dkhot ba kin pyrto ïa ki kam ki ba kum ki nongïalam ba rim ki la prat lynti na ka bynta ka bha ka miat jong ka Ri bad ka Jaitbynriew.
