MAWKYRWAT:
Ka Khasi Students Union South West Khasi Hills District myn ha ka 30 tarik u Naiwieng 2023 kala ïoh ban Rakhe ïa ka lyngkhuh sngi ïap kaba 175 jong u Sngap Singh Syiem u Syiem jong ka Hima Maharam Syiemship.
Ha kane ka sngi kyrpang, u Bah Renikton L. Tongkhar MLA ka Mawkyrwat Constituency u la long u kongsan ha ryngkat da ka jingïadonlang u Pa im Niandro Syiemiong u ba dei u Syiem ka Hima Maharam Syiemship, u Bah L.T.Tariang ADC, u Dr. K. K. Nongsiej uba dei u Principal ka Sngap Syiem College, u Bah Forwardman Nongrem, u President ka KSU South West Khasi Hills District bad kiwei de ki dkhot jong ka KSU bad ki riew rangbah jong ka thaiñ ha ryngkat ki trai jaka ba la tei ïa u ne u mot sah kynmaw jong u Sngap Singh Syiem.
Ha kane ka sngi na ka liang u Bah Renikton L.Tongkhar u la ïoh ban plie ia u Mawnongrim jong ka jingker ïa u Mot sah kynmaw jong u Sngap Singh Syiem.
U bah Renikton L.Tongkhar haba ai jingkren ha kane ka sngi, u la ai ka jingkhublei bad ka jingsngewnguh ïa ka KSU ba ki la kynmaw burom ïa u Syiem ba khraw jong ka Hima Maharam U Sngap Singh Syiem kumjuh ruh u ïa ka kur Syiemlieh bad ïa ka shnong Mawtngam bad ïa ki trai jaka ba ki la kynmaw burom ïa kane ka sngi ba kyrpang jong u Sngap Singh Syiem.
