SHILLONG:
Ha ka miet jong ka 14 tarik u Jylliew, ki pulit na Mawlai Police Station ki la leit shim noh ïa ka metïap jong ka wei ka longkmie ka ba dang armet na Mawlai Mawdatbaki Mali-I.
Kane ka longkmie ka ba la khlad ka dei ka ba la tip kyrteng kum ka Kong Stefanie Lyngdoh Nonglait 30 snem ka rta, kadei ka longkmie ka ba la don ar ngut ki khun bad kaba dang armet bad i khunlung ba dang 2 bnai ha kpoh bad ka shong basah ka Mawlai Mawdatbaki Mali-I, hajan u lumjingtep ka Balang Presbytarian.
Ïa ka met jong ka kong Stefanie la lap na ka ïingsah jong ka, ha jingthiah haryngkat ki dak ki shin na ki bynta ka ryndang, na ka liang ki pulit ki la pynkit noh ïa ka met jong ka sha NEIGRIHMS Hospital ban leh ïa ka ba donkam.
Na ka liang ki bahaïing jong ka Kong Stefani Lynhdoh Nonglait, ki la kyntait ban pdiang bad ka Kong Stefanie kan shim hi ïala ka jingim, namar ba ka dei ka briew ka ba shait bakhlaiñ ha ka bor met bad bor jabieng.
Ki bahaïing jong kane ka longkmie ha ka 15 tarik Jylliew ki la ujor da ka ejahar ha Mawlai Police Station, halor ka jingsuba sniew ïa ka jingkam jong u lok jong ka u Bah Trouphious Nongbri ba ka la shim hi ïa la ka jingim lade.
Katkum ka jingïathuh jong ka Kong Amanda Lyngdoh Nonglait ka para jong kane ka longkmie ka ba la khlad ka la ong “Ha ka por 9 baje eiei mynmiet u lok jong ka Kong Stefanie, u la wan mareh sha ïing jong ngi ha Mawlai Nongpdeng, bad ong ha nga ba ka hep (Stefanie) ka la leh kulmar ïalade bad kam don shuh, ha kane ka por ki la mareh sha kane ka ïing basah kane ka longkmie bad lap ba ka met jong ka Stefanid ka don ha jingthiah bad la pyntap bha ïa ka met kumba pynthiah.
Ka la bynrap, “Ka ïing ha ba nga poi ka long ka ba kham pher khyndiat ban ïa ka ba nga la leit mynshisngi bad ka met ïap ka la jngem bad ka don dak na ryndang. La pynthiah ha jingthiah bad pynkup ïa ka met da ka nep kum ba pynthiah”.
Ka Amanda ka la ong shuh shuh, “U lok jong ka (u Trouphirious), haba u la wan ha ïing jong ngi, u ïathuh ïa nga da ka ba ong ba ka Hep ka la leh kulmar ïa lajong, bad u la ong ba kam don shuh, u la ïathuh ba haba u la poi ha ïing ka met jong ka, ka la pjah,bad ki khmat ki peit shajrong, kumta nga la pyntap ïa ki bad ka don ka dak ba saw ha ryngdang”.
Ki ba haïing ki la ïathuh shuh shuh, “Ha ka por 9 tam ha ba ngi la poi ha kane ka ïing ngi lap ïa ka met ba ka don ha jingthiah, bad ym shem don uno uno u tyllai ha sad, bad kumno haba u la tip ba ka la khlad kumba u kam ba ka phasi hi ka met ka dei ban don ha u tyllai, bad ha ka jingshisha u la dei ban khot ïa ki para marjan ban ïarap lang ïa u, hynrei ka met ka don ha jingthiah bad u pynkup ïa ka nep”.
Ka Kong Amanda ka la ïathuh ruh, “Kine ki shikurim, ki ju don ka jingïashrut man ka por, kum shitnga hi bad ka Kong Stefanie ka ju ïathuh ha ka para halor kane bad ka la phah ruh ïa ka massage halor ka jingsuba ba u don kynthei shawei. Kumta kaei ka ba jia ïa ka hymmen ngi kwah ban tip ïa ka jingshisha”.
Ha ka 14 tarik Jylliew na ka liang ki bahaïing ki la pyntip noh sha ki borshnong bad na ka liang ka borshnong ka la pyntip noh sha ki bor pulit bad ki la shimti noh ïa ka met ban pynrah sha NEIGRIHM na ka bynta ban leh ïa ka post mortem bad kem noh ïa u lok jong ka.
Na ka liang u heh pulit ha ba kren halor kane ka jingjia u la ïathuh ba ki pulit ki dang pynlong ïa ka jingtohkit ban lap ïa ka jingshisha bad ïa u lok jong ka la ïoh ban kem noh ha ka 14 tarik ban pynlong ïa ka jingtohkit.
