SHILLONG:
U President ka Voice of the People Party (VPP), u Bah Ardent Miller Basaiawmoit u la kyntait ban ïadon bynta ha ka komiti ba la thaw da ka sorkar jylla ban ïakren bad ïatai ïa ki mat halor ka Roster System jong ka Reservation.
Haba pyntip ïa kane, u nongïalam ka VPP u Bah Ricky Syngkon u la ïathuh ha ki lad pathai khubor ha ka 27 tarik Jymmang ba ka rai ban ym ïadon bynta ha kane ka komiti ka long namar ba ka jingkylli ban ïakren halor ka roster kam mih namar ka jingïeng ka seng ka long kaba shai bad kata ka long ka jingdonkam kaba kyrkieh ban khmih biang ïa ka Reservation Policy.
Lah ruh ban kdew ba ka komiti kaban khlieh da ka Kong Ampareen Lyngdoh, ka kynthup ïa ki dkhot na baroh ki seng saiñ pyrthei jong ka jylla.
Ki dkhot ki kynthup ïa u Zenith Sangma ka AITC, u Bah HM Shangpliang ka BJP, u Augustine Marak ka GNC, u Bah Methodius Dkhar ka HSPDP, u Bah Ronnie V Lyngdoh ka INC, u Bah Pyndapborthiaw Saibon ka KHNAM, u Dr WR Kharlukhi ka NPP, u Bah Renikton Lyngdoh Tongkhar ka UDP bad u Bah Ardent Miller Basaiawmoit ka VPP.
Shuh shuh u Chief Secretary ka Meghalaya un long u dkhot ka komiti, katba u Commissioner and Secretary of Personnel & AR (B) Department un long u member secretary.
