UMSNING:
Ka Hynñiewtrep Integrated Territorial Organization (HITO), ha ka 9 tarik Jylliew ka la pynlong ïa ka jingïalang paidbah ha Ïew Umsning ban pynshai halor ka jingkren u Dr. Celestine Lyngdoh ha ka jingïalang paidbah ha ka 6 tarik Jylliew ha Umsaitsning.
Haba kren sha ki paidbah ha kane ka jingïalang, u President ka HITO u Bah Donbok Dkhar, u la kynthoh ïa u MLA ka Umsning u Dr. Celestine Lyngdoh halor ka jingsngap mynthi jong u ha kaba ïadei bad ka mat halor ka Reservation Policy mynba u la jop ïa ka elekshon ha u snem 2013. U la ong ruh ba ka jingsngap mynthi jong u MLA ka la pynlong ïa ka seng ban pyrkhat ba u dang thiah, kumta ka la bthah ïa ki dkhot jong ka ban tied tin ban kyrsiew thiah ïa u.
Ha kaba ïadei bad ka Reservation Policy ha ka jylla, u Bah Donbok u la ong ba kane ka policy kam pat dei kaba pura namar ba ki la lap ha ka RTI ba ki la pan ba haduh mynta ka dang dei tang ka Office Memorandum.
“U MLA jong phi u ïalam bakla ïa phi, da kaba ong ba ngin sa duh noh ïa ka 80 per cent wat ha ki distrik ruh. Hynrei la thoh shai ha kajuh ka Memorandum ba ka 80 per cent ha ki distrik kan neh wat lada ym don ki Garo,” u la ong bad u la bynrap ba, “Kine ki nongsaiñ pyrthei ki pyrshang ban ïoh jingmyntoi ha ka saiñ pyrthei na kane ka mat, da kaba ïalam bakla ïa ki paidbah ba lui lui.”
Haba kren halor ka jingkren u MLA ba kin duh noh ïa ka 80 per cent lada kane ka mat ka leit sha ka Ïingkashari, u Bah Donbok u la ong, “Hooid ngi burom ïa ka Ïingkashari, hynrei ngim dei ban sheptieng namar ba ka Ïingkashari kan ai ïa ki jingbishar jong ka ym kum ki nongsaiñ pyrthei.”
“Ka jingdawa jong ngi ka ïeng ba dei ban khmih biang ïa ka Policy, namar lada ym mynta te ka pateng ban wan kan sa ïakynduh ïa ka jingeh kaba khraw,” la bynrap u Bah Donbok.
