SHILLONG:
U nongïalehkai kriket barim ba dei ruh u nongïalam ka All India Trinamool Congress (AITC), u Kirti Azad ha ka 22 tarik Nohprah, u la kynthoh ïa ka dur jong u Myntri Rangbah duh ka ri da kaba bteng ïa ka dur jong u Narendra Modi bad kawei pat ka dur ba kdew ïa ki dak ba print ha ka jymphong khasi bad ong ba ym ithuh shynrang ne kynthei shuh na ka jaiñ ba u phong.
La pdiang burom ïa u Narendra Modi ha ka jylla Meghalaya ha ka sngi ba u wan ban sakhi ïa ka jingdap 50 snem ka North Eastern Council (NEC) myn ha ka 18 tarik Nohprah 2022 ha kaba la ai ha u ïa ka jymphong ban sap kum ka burom na ka liang ka jylla ban pyni ïa ka jingriewspah ka kolshor ki nong Meghalaya.
U Kirti Azad u la kynthoh ïa ka jymphong ba la pdiang burom ïa u Narendra Modi da kaba ong ha ka twitter jong u Modi ba ym lah satia ban ithuh la ka dei ka jaiñ kynthei ne ka jaiñ ban phong u shynrang bad ki don ki dak ba kdew ba lada don ba kwah ban thied ki lah ban order.
Ha ki kyntien ba u la kynthoh la don ruh ka jingong, “ Ym lah satia ban batai la ka dei ka kynthei ne u shynrang, ka dei tang ka jaiñ phong style jong ki lyngdoh”.
Na ka liang u Myntri Rangbah ka Assam, u Himanta Biswa Sarma u la kynthoh ïa u Azad halor ka jingbym pyrkhat shuh jong u ïa ka kolshor ka burom jong ki riew lum.
Ha ka jingkynthoh ba la ai da u Azad, u Himanta Biswa Sarma u la pynphai lang ïa ka jubab da kaba ong, “Ka long kaei kaei ka ba sngewsih ban ïohi ba u Kirti Azad um burom satia ïa ka kolshor jong ka Meghalaya bad u kheiñ thala ïa ka riam tynrai ki khasi”.
