SHILLONG:
Ka Khasi Student’s Union (KSU) East Jaiñtia Hills Unit, ka la phah ïa ka kyrwoh ka ba shai sha ka Jaiñtia Hills Autonomous District Council (JHADC) ba da lei lei ruh kam dei ban ai ka No-Objection Certificate (NOC) sha ka North East Frontier Railway (NFR) ba ka bynta ban pynurlong ïa ka jingthmu ban wanrah lynti rel ha ka jylla.
Kane ka kyrwoh na ka seng ka la mih shisngi hadien ba na ka liang u Myntri Rangbah ka jylla u Conrad K Sangma u la pyntip ba na ka liang ka sorkar, hadien ba la pynsangeh noh ka jingwad jaka ban tei ïa lynti rel ha East Khasi Hills bad ha Ri Bhoi, mynta kan sdang ban wad jaka noh sha kiwei ki thaiñ, ka ban long ha Khliehriat, East Khasi Hills District.
Haba kren sha kilad pathai khubor u Bah Streamly N Suchen President KSU EJH Unit, u la ïathuh ba na ka liang jong ka Seng ka pynpaw ïa ka jingpyrshah ka ba jur halor ka jingthmu ban wad jaka ban wanrah ïa ka lynti rel ha East Jaiñtia Hills.
“Hadien ba ngi ïohi ïa ka kyrwoh jong u Myntri Rangbah ka jylla, na ka bynta ban pynpoi ïa ka lynti rel ha ka thaiñ jong ngi, ka East Jaiñtia Hills, ngi la leit ban ïa kynduh ïa u Deputy Commissioner ka East Jaiñtia Hills, ban ïakren bad ai ruh ka jingthoh kum ka dak ban pyrshah ïa kane ka jingthmu”, u la ong.
U la bynrap “Na ka liang ka seng ka la ïoh ban ïakren bad u Deputy Commissioner halor kane ka bynta bad ka seng kan ym lah ban pdiang ïa ka lynti rel namar ngim kwah ba ka East Jaiñtia Hills kan long ka khyrdop ïa ki mynder ri”.
U la ong shuh shuh “Ngi la kren shai ba katba ym pat lah ban biang ki aiñ ki kanun ki ban ïada ha ka jylla na ka liang ka seng ka kan ym pdiang ïa kane ka project ha ka thaiñ lane ha baroh kawei ka bri u Hynniewtrep”.
“Ngi kren shai ba ngi pyrshah ïa kane ka jingthmu namar ngi tip ba ki jaitbynriew ka don hapdeng ka jingma ka ba khraw lada wan ka lynti rel namar ka jingbym don ki bor ïada”, u la bynrap.
U nongïalam ka KSU u la ïathuh ba ka seng ba kane ka thaiñ ruh kan ïeng ha ka nongrim kum ba ka seng ha baroh kawei ka jylla ka pyrshah ïa kane ka jingthmu jong ka Sorkar Jylla lane ka sorkar India ban wanrah ïa ka lynti rel.
“Ka khubor ka ba shai sha ka sorkar jylla ka long ba ha ka jaka ban angnud ban wanrah ïa ka lynti rel ha ka jylla ka la dei ban kham trei shitom ban wanrah ïa ki kam pynroi na ka sorkar India namar ba ka jylla ka dang duna ha ki ab bun ki liang”, u la ong.
U la bynrap shuh shuh, “Ka jingthmu jong ka sorkar ban wanrah ïa ka lynti rel ka dei ka jingthmu ban ïuhroit ïa ka jaitbynriew, ha ka jaka ba kan pyrshang ban wanrah ïa ki kam pynroi na ka sorkar pdeng ka thmu pynban ban wanrah da ka lynti rel ban pynjah klep ïa ka shnat ba kyrpang jong ka jaitbynriew jong ngi”.
Na ka liang ka seng ka kyntu jur ïa ki nongïalam shnong, ki nongïalam ki Raid ki Elaka, ki Doloi ba ki dei ban ïatrei lang halor kane ka bynta bad ban long ki ba peitngor ban pyrkhat ïa ki pateng ki jaitbynriew.
Ka Seng ka kyntu jur ïa ka Jaiñtia Hill Autonomous District Council, ba kan long kum ka stieh ha ka ba ïadei bad kane bad ka dei ban khanglad ïa kane ka jingthmu bad ymdei ban ai NOC sha ka sorkar.
“Ka District Council kaba dei ka nongbat kynti ka nongïada ïa ka jaitbynriew kam dei ban ai NOC sha ka sorkar ban wanrah ïa ka lynti rel ha ka jylla jong ngi bad lada ki nongmihkhmat ka sorkar ka thmu ban thok ïa ki jaitbynriew ngin ym aili”, u la ong.
U la bynrap, “Wat pyrshang jubor ban wanrah ïa ki aiñ ïakjakor ban nguid ïa ki jaitbynriew jong ngi, ïoh klang ka ding kane ka dei ka khubor ba shai sha ka Sorkar jylla”.
