SHILLONG:
Shisngi hashwa ba ka sorkar MDA –II kan pynlong ïa ka jingïalang jong ka All Party Meeting na ka liang ka Khasi Student Union (KSU) mynta ka sngi ka 18 tarik Jymmang, ka pynmih ïa ka kyrwoh ban ai jingmut ïa ki MLA Khasi ban ïatylli da kawei ka jingmut ban pyrshah halor kane ka jingphaidien ïa ka jingpyntreikam ka roster System jong ka Sorkar Jylla.
Katkum ka kyrwoh na u General Secretary ka seng, u Bah Donald V Thabah u la pynpaw ba ka Roster System hi ka dei namar ka jingbthah jong ka High Court ka jylla Meghalaya ïa ka sorkar jylla.
“Hynrei kaba sngewsih pat ka long ba ka sorkar jylla haba pyntreikam ïa kane ka Roster System ka la kyrtiang biang shadien da kaba wanrah ïa ka jingbym biang ïoh kam ki Garo katkum ka bhah 40:40 katkum ka jingujor katto katne tylli ki kynhun sengbhalang na Garo Hills” la ong ka kyrwoh.
“Ka KSU ka la pynpaw ruh ba kane ka jingleh jong ka sorkar jylla ka la ktah ïa ki samla Khasi kiba wad kam namar ka jingïoh bhah mynta kam dei shuh 40% hynrei ka la nang duna”.
“Hooid lada kheiñ wat na ka jingdon briew ruh ka bhah 40:40 ka la pynduh nong bha ïa u Khasi namar ka Jaidbynriew Khasi ka kham heh paid ban ïa ka Jaidbynriew Garo hynrei ka jingkyrtiang dien (retrospective) ïa ka roster system ka la buh jingeh arshah ïa ki samla Khasi ba mynta namar kim ïoh pura shuh wat tang ïa ka bhah 40%”.
Dei halor kane ka nongrim, ka KSU ka kyntu ïa baroh ki MLA Khasi ba ki dei ban pyrshah ïa ka jingphai dien ka sorkar ïa ka roster system bad ban dawa ban pyntreikam beit shakhmat (prospectively).
Ka seng ka la pynpaw ruh ba lada ka sorkar ka sngew ba kane ka jingleh jong ka ka long ban pyndap ïa ka jingduhnong ki Garo naduh u snem 1972, ka long pat ka jingpynshitom, jingpynsaja bad jingtei pop ïa ki samla Khasi kiba wad kam mynta.
“Tang namar ba phi sngew ba kiba mynshwa ki la bakla ym dei pat ban pynshitom ïa ki samla Khasi mynta kiba luilui ki bym don bynta eiei ha ki jingjia ba mynshwa hynrei kiba kwah tang ban ïoh ïa la ka hok ka bhah ha ki kam sorkar”, la ong ka KSU ha ka kyrwoh jong ka.
Halor kane, ka KSU ka dawa ruh ïa ka sorkar MDA ba ka dei ban pyntreikam shakhmat ïa ka Roster System bad ym ban phai shadien kaba long ka jingïohnong ïa kawei ka jaidbynriew bad ka jingduhnong ïa kawei pat.
