JOWAI:
Ka Khasi Students’ Union (KSU) Jowai Unit ha ka 16 tarik Jymmang, ka la leit ban talasi ïa ki bar jylla kiba kamai spah sahuh ha Ïawmusiang, Jowai ha kaba ka seng ka la lap ba ki dei ki bym don satia ïa kino kino ki kot ki sla kiba donkam.
Ha katei ka jingleit khynra kot khynra sla ka seng ka la lap ba kitei ki bar jylla kiba don ha Ïawmawsiang ki la leh trai shaba palat pud da kaba pynlong dukan die tiar die tar ha lynti syngkieng bad harud surok wat hapdeng ba ki bor ba pynïaid ïa ka ïew ka hat bad ka JHADC ki la pyrkhing da ki kyndon kiba tyngeh.
Kum ban pynkynmaw, ka bor jong ka JHADC bad ki Hima Sima ki la ju maham tyngeh ïa ki trai ri trai muluk ban die jingdie ha ki lynti ïaid kjat pynban haba wan kine ki bar jylla ki leh trai bad ym don ba leh eiei. Kane ka jingleh laitlan jong kine ki barjylla ka la pyn bitar ïaka seng bad na ka liang ka seng ka lah pynher krad lut shisyndon ïa baroh kitei ki barjylla kiba shong dukan beaiñ.
Shuh shuh ka seng ka la maham jur ba kitei ki bar jylla kim dei shuh ban wan thaw jaka kamai spah beaiñ ha katei ka Ïew namar ka dei ka Ïew kaba kyntang.
Ha katei kajuh ka sngi, ka KSU Jowai Unit ka la ïoh ruh ban ïakynduh markhmat bad ki bor ba dei peit ïaka District Council, ha kaba na ka liang ka seng ka kyntu jur ïa ka JHADC ban pynlong ka jingkhynra kot khynra sla na ka por sha ka por ïa ki bar jylla kiba wan kamai beaiñ hapoh u pud u sam ka JHADC.
Na ka liang ki bor ba hakhlieh ka Council, ki la kular ba kin ïai bteng barabor ïa ka jingkhynra ïa kum kine ki nongwei kiba shu wan kamai beaiñ kynjai khlem don satai ïa ki kot ki sla donkam.
Ka seng KSU ka pynpaw ruh ba ka Council ka dei ban pynkloi ïa ka jingkhynra kot khynra sla ha kylleng ki bynta ba dei peit ka JHADC khnang ba ki khar poi ei ki bym biang satia ki kot kin hap ha ki jingshah pynshitom kiba tyngeh.
Ha katei ka sngi la lamkhmat ïaka kynhun KSU da u Samla Leonard Dhar uba dei u General Secretary ka KSU Jowai Unit, ha ryngkat ka jingdon lang u Assitant General Secretary Samla J.Yndoh, u Office Secretary u Samla W.Phawa bad ka Kong Ladaplin P Hayong ba dei ka President Women’s Wing War Jaiñtia Circle .
