SHILLONG:
Man la ka snem da ki hajar ngut ki samla pule ki pyndep ïa ki jingpule jong ki ha ki kyrdan ki bapher bapher ha ka jylla, bad hadien ba ki la pyndep ïa ki jingpule ki thrang ban ïoh ka kam ka jam kaba biang, bad ka jingkylli ka mih naei yn lah ban pynbiang kam ïa kine ki samla.
U MP ka Rajya Sabha u Dr WR Kharlukhi haba kren ha ka prokram jong ka ICFAI university Meghalaya, u la ong, “Kan long kaba eh namar da ki hajar ki samla pule ki mih na ki jaka pule man la u snem bad kim don kam don jam, wat la ki pyrshang ha la ki jong ki bor ban wad kam wad jam.”
U la bynrap da kaba ong, “Kum ka sorkar ha kine ki san snem kala sdang ïa ka start up ha kaba bun ki samla ki la mih sha khmat bad da ka jingïarap ka sorkar jylla kila sdang ban seng kam seng jam da lade.”
U Dr Kharlukhi u la bynrap da kaba ïathuh ba ha ka wei ka jingai jinghikai ïa ki samla halor ka ïoh kam ïohjam, ha kata ka jingai jinghikai, ka phang kaba ki ïa kren ka long ‘Wat long ki samla kiba wat kam hynrei ki samla ki ban ai kam ai jam ïa ki wei pat.’
Na ka liang u Dr Kharlukhi,u la kyntu ïa ki samla ban mih sha khmat ban seng kam sengjam lyngba ka Prime Hub kaba ka sorkar jylla kala sdang.
Na ka liang u Bah RK Vijay Byrsat u ba dei u Managing director jong ka Center of Learning Knowledge and Service (COLKS) haba kren ha kane ka sngi u la kyntu ïa ki samla pule kane ka skulbah ban mih sha khmat ban sdang ban seng kam seng jam ym ban ap tang ïa ka kam sorkar.
“Ha ka sorkar Meghalaya ki don haduh 55 hajar ngut kiba kren kam sorkar haba ka jingbun paid jong ngi ka long da ki lak ngut ha kaba 55 hajar ki dei ki nongtrei sorkar, haduh katno ngi hap ban ai kam ai jam biang,” u la ong.
U la bynrap da kaba ong ha ka jaka ban long ki nong wat kam balei ngim long kiba ai kam ai jam ïa ki wei pat.
