SHILLONG:
U Bah Manbha Jyrwa u Vice Chairman ka Hynñiewtrep National Liberation Council (HNLC) u la ong ba mynta ka kynti hapoh ka jingïalam ka sorkar Meghalaya Democratic Alliance (MDA) ki nongïalam ka seng ki don ïa ka jingkyrmen ba ka jingïakren ïasuk kan sa long ka ba jop.
Ha ba kren sha ki ladpathai khubor u Bah Manbha u la ong, naduh ki snem ba la dep ka la ju don ka jingpyrshang jong ka seng ban wan noh sha ka miej ban ïakren ïa suk hynrei kane ka la shu sah teng na ka daw ba kam shem la don kano kano ka jingshimkhia na ka liang ka sorkar.
“Ka jingpyrshang ban ïa kren ïa suk ka la sdang naduh kip or ba la dep hapoh ka jingïalam u Rev PBM Basaiawmoit bad ka jinglong myntri kampohing ka kong Roshan Warjri, hynrei kam shem la poi sha ka jingjop namar ba kam shem la don ka jingshim khia na ka liang ka sorkar ba la dep”, u la ong.
“Ngi la ïohi ïa ka jingshimkhia na ka bynta ka jingïakren ïasuk jong ka sorkar bad ka kynhun kiengatiar ka ANVC ka ba la urlong hynrei ïa ngi ka HNLC ka sorkar ba la dep ka la leh shilliang khmat”, u la bynrap.
U Bah Jyrwa u la ong shuh shuh, “Hynrei mynta ka kynti hapoh ka jingïalam ka sorkar MDA ka don ka jingshimkhia ban pynurlong ïa kane ka bynta bad ka la pynshisha ruh ïa kata te ngi don ka jingkyrmen na ka ne ka sorkar MDA”.
Haba kylli halor ka jingsngew jong ka seng halor ka kaiphod shah pynïap u nongïalam barim ka seng HNLC u bah Cheristerfield Thangkhiew u bah Sadon Blah u ksiang ka HNLC u la ong, “Kaei ka ba la jia ïa u bah Cheristerfield Thangkhiew, bad kaei ka sngew, ngi kubur ba u bah Thangkhiew u dei u nongïalam ka seng hynrei lait na u bah Thangkhiew ki dang don ruh bun kiwei pat ki ba la aiti ïa la ka jingim na ka bynta ka nongrim ka seng”.
“Na ka liang ka HNLC la don ka jingïakren ban ïakren halor ka jingshah siat ïap u Bah Cheristerfield Thakhiew ha u snem 2021 bad ka seng kam pat hun ïa ka jinglap na ka jingtohkit na ka ne ka jingjia hynrei ka seng kan sa rah ïa kane hapoh ka jingïakren sani bha ynda la sdang ban ka jingïakren ïasuk”.
