NONGPOH:
Kumba 20 tylli ki shnong ka thaiñ Nongpoh kiba hap hapoh ka Nongpoh Census Town kin sa ïoh umbam, ha kaba u Bah Renikton L. Tongkhar, Myntri ka tnat PHE, ha ka 4 tarik Kyllalyngkot u la buh ïa u Mawnongrim ban wanrah ïa kawei ka skim sam umbam sha kitei ki shnong kaba la tip kum ka Greater Nongpoh Water Supply Scheme, kaba yn sa shna ha ka jingpynmang tyngka kaba la kot sha ka T. 103 klur tam.
Ïa katei ka jinglang buh Mawnongrim la pynlong ha District Library kaba don ha Nongpoh, ha kaba kiba la donlang ha katei ka sngi, ki kynthup ïa u Bah Mayralborn Syiem, MLA Nongpoh, nangta u Bah Balajied Rani, MDC Nongpoh, u Syed Md Andalaab Razi, Commissioner Secretary ka tnad PHE, ka Kong BM Lyndem, Chief Engineer ka tnat PHE, u Bah U Kurbah EE ka tnad PHE Nongpoh Division, ki Rangbah Shnong bad ki nongmihkhmat ka thaiñ Nongpoh.
Haba ïadei bad katei ka sngi buh Mawnongrim, ki nongai jingkren ki la ïaroh ïa ka sorkar pdeng, nangta ïa u Bah Renikton L. Tongkhar, Myntri ka tnat PHE, ïa u Conrad K Sangma bad khamtam eh ïa u Bah Mayralborn Syiem, MLA Nongpoh bad uba la trei shitom eh ha ka ban buddien bad ban pynurlong syndon ïa katei ka mat jingdonkam kaba hakhmat eh jong ki paidbah ka thaiñ Nongpoh hi baroh kawei.
Haba ai jingkren ha katei ka sngi, u Bah Reninton L. Tongkhar, uba kam ïalade ba u ïadei paralok eh bad u Bah Mayraldborn Syiem, u la pynpaw ba hadien katei ka jingbuh mawnongrim u kwah ruh ba ha ka sngi kaba yn sa plie paidbah ïa katei ka skim umbam, yn sa plie hi da u Bah Mayraldborn Syiem, uba long mynta kum u MLA ka Nongpoh.
