SHILLONG:
Ka Congress ha Meghalaya, ha ka 27 tarik Jymmang ka la ong ba ka por ka la dei ïa ka sorkar jylla ban khmih biang ïa ka Reservation Policy ha ka jylla, bad ka la bynrap ruh ba la dei ban khmih biang ïa ka policy ba rim man ka 10 snem.
“Ki paidbah ki la buh ka jingkylli halor ka jingsngap jong ngi halor ka reservation policy. Ka jubab jong nga ka long kaba ba beit – Ngim sngap sgnap jar, ngi long phikir. Hooid, ka jubab jong ngi halor kane ka mat ka la shim por namar kum ka seng kaba la rim tam ha ka Ri, kano kano ka rai kaba ngi shim, ngi pynthikna ba kan ym ktah ne pynmynsaw ïano ïano,” la ong u MLA ka Congress na Mawhati u Bah Charles Marngar.
U la ong ruh ba ka seng ka shimkhia halor kane ka mat, bad u la bynrap ruh ba naduh kaba sdang, ka Congress ka la ïakren halor kane ka mat. “Ha ka jingïalang jong baroh ki seng saiñ pyrthei ba la khot da ka sorkar ha ka 19 tarik Jymmang, ngi la pynshai ïa ka jingïeng jong ngi bad kata ka long ban pyntreikam ïa ka roster system da kaba peit shakhmat,” la ong u Bah Charles.
“Nga kyntu ïa ki paidbah ba kim dei ban shah ïalam bakla. Sngewbha sngewthuh ïa kane – ka Congress kam kyrshan ïa ka sorkar hynrei kum ka seng, haba ka sorkar ka ong ba kan sa thaw ïa ka komiti jong ki stad ban peit biang ïa ka jingpyntreikam ïa ka roster system, ngi pdiang ïa kane ka sienjam,” u la bynrap.
U la pyntip shuh shuh ba ka Congress kan sa thaw ïa ka komiti kaban khlieh da u President jong ka Meghalaya Pradesh Congress Committee (MPCC) u Bah Vincent H Pala, bad kaban kynthup ïa baroh ki MLA jong ka seng, ban pule, ban ïakren bad ban ïatai kham bniah halor ka reservation policy bad ka roster system.
Haba kdew ba ka reservation policy ka la palat ïa ka 50 snem, u MLA ka Congress u la ong ba la dei ban khmih biang man ka 10 snem ïa ka polisi kaba la rim. “Ngi tip ïa kane bad kumba la leh ha kiwei ki jylla jong ka Ri, ka la dei ka por ba ka jylla Meghalaya ruh kan khmih biang ïa ka reservation policy,” la ong u Bah Charles.
Haba jubab ïa ka jingkylli halor ka jingïakhih da kaba shah thngan ba la khot da u President ka Voice of the People Party (VPP), u Bah Ardent Miller Basaiawmoit, u Bah Charles u la ong, “Ngim kwah ban ong eiei ïa kaei kaba kiwei ki seng ki leh. Ngim wan hangne ban kynthoh ïa kano kano ka seng ne uno uno u riew shimet. Ngi wan hangne ban pynshai ïa ka jingïeng jong ka Congress.”
“Shen ngin sa mih paidbah bad pyntip paidbah ïa ka rai jong ngi halor kane ka mat,” la bynrap u Bah Charles.
