SHILLONG:
U Symbud Myntri Rangbah ka jylla u Bah Prestone Tynsong, u la ïathuh ba ka jingkhot tender biang na ka bynta ka surok Shillong-Dawki Road Project ka la ïaid shait shait, na ka bynta ka Package I ka ban kynthup ïa ka surok naduh Umshyrpi sha Baniun.
Ha ba kren sha ki ladpathai khubor u Bah Prestone u la ong ba ka sorkar ka la dep ban aiti ïa ka ne ka project sha ka National Highways & Infrastructure Development Corporation Ltd (NHIDCL), lait noh ka defence land, ka ba na ka liang ka NHIDCL kan hap ban bud bad ka Ministry of Defence na ka bynta ka surok na Rilbong sha Upper Shillong ka ba hap hapoh ka defence land.
“Na Delhi hap ban rai ba ïa kane ka jaka kin ai sha ka NHIDCL na ka bynta ban shna ïa ka four-lane highway ha ka ne ka jaka bad ha ka ba ïa dei bad ka sorkar jylla , ngi la dep ban aiti ïa kane ka jaka sha ka NHIDCL, lait noh tang ka jaka ba hap hapoh ka defence,” la ong u bah Tynsong.
Halor ka jingjia ki jingtwa khyndew ha ki surok bah u bah Tynsong u la ong ba ka tnad ka la dep ban bthah ïa ki bor ba dei peit ban long ki ba peitngor halor ki jingpynjulor ka mariang bad lada don ka jingtwa haei haei ki bor ba dei peit ki dei ban shim khia mardor.
“Ngi la dep ban bthah ruh ïa ka NHIDCL, ba ki dei ban long ki ba peitngor 24/7, ha ryngkat ki kor ki bor ba lada jia ka no knao ka jingtwa khyndew ki dei ban pynkhuid mardor ban ym thud ka ïaid ka ieng ka lynti”, u la ong.
U bah Tynsong u la ong shuh shuh, “Ha ba ïadei bad ki surok bah kam dei ka ba hap hapoh ka sorkar jylla, ïa ka surok Shillong-Dawki la aiti sha ka NHIDCL bad ïa ka Guwahati, Jorabat, Sonapur terter la ai sha NHAI, kine ki dei ki ba hap hapoh ka Ministry of Road Transport ka sorkar India, na ka liang jong ngi ki la bthah ba lada don kano kano ka jingpynthud ki dei ban shim khia mardor”.
