SHILLONG:
U MLA ka 17 –North Shillong Constituency u bah Adelbert Nongrum u la ong ba lada ki jaitbynriew Harijan kiba sah ha Them Ïew Mawlong kin kyrshan ne em ïa u ha kane ka elekshon hynrei yn ïeng ban pynsawa ïa ka sur ba donkam ban pynkynriah noh ïa ki na kane ka jaka.
Haba kren bad ki lad pathai khubort u Bah Nongrum u la ong ka jingpynkhreh ïa ka elekshon ka la sdang mynta la san snem, u la ïatyllun lang ha ki kamram kum u MLA baroh san snem.
Haba kylli halor ka jingpynïasoh jong u sha ka Voice of People Party (VPP) u la ong ba mynta ym pat lah ban ong lano yn pynïasoh sha ka VPP hynrei ka long ka ba shai ba yn sa pynsïasoh noh shen.
Halor ka jingïakhun elekshon u la ong, “Ngam don jingartatien ïa ka jingjop hynrei ngam dei ban kop pat bad naduh ka sngi ba nyngkong hi ka jingrung jong nga sha ka kam sain pyrthei ka long ym ban leh kamai spah lane ban shu ïa kren politik hynrei ban ïa kren policy”.
“Ngam don jingartatien namar nga la kular ïa u paidbah ba ka jingrung jong nga sha ka Politik kan long ba ngan tyrwa ïalade kum u atiar na ka bynta u paidbah”, u la bynrap.
Haba kylli ba ha kane ka elekshon hato kan don ka jingktah ïa ka Vote na ki jaitbynriew Harijan na Them Ïew Mawlong , u la ong, “Ngan kren shai namar ba ngam ju ïapeiñ ïa la ka nongrim bad haba ngi don ha la ka jong ka Ri ngin hap ban pynpaw ïa ka jinglong trai jinglong kynrad”.
“Kiwei ki jaitbynriew ki dei tang ki nongshong wai bad haba ki long nongshongwai kin hap ban burom ïa ngi ki trai ri trai muluk bad halor kane naduh u snem 2013, nga la leit ban ïa kynduh ïa ki jaitbynriew Harijan ha Them Ïew Mawlong bad nga la kren shai ïa ki ba kongsan kum u MLA ngan ïa shong ïa syllok bad ngan leh ïa ka ba dei”, u la bynrap.
“Kaba mut ba la ngan ïoh vote ne em na ki jaitbynriew Harijan ruh ngan hap ban pynsawa ïa ka sur ba ka sorkar ka dei ban pynkynriah noh ïa ki namar kam dei ba ngi isih hynrei ka dei tang ka jingbym long sah shuh kane ka jaka”, u la ong.
U Bah Nongrum u la ong ruh ba kumba ka sorkar ka la pyni ïa ka mon ban trei hadien ba ka la rai ban buh haduh 7 tylli ki BOP na ka bynta ki jaka ha khappud kum kane ka mon ka sorkar ka donkam na ka bynta ka Harijan Colony bad wat pyntreikam ïa kane tang na ka bynta ka elekshon.
“Ngam ju ñiewkor ïano ïano ruh hynrei nga ñiewkor ïa ki mat jingeh na kata ka daw ba nga la ïoh ïa ka jingjop ha ka 2018, wat nga la ïeng na ka party riewlum ha ka jingdon 50 % ki jaitbynriew trai ri bad 50 % ki bar jylla ruh nga la ïoh ïa ka jingjop namar ngam ju kynriah nongrim la nga don ha liang pyrshah ne ka sorkar”, u la ong.
Halor ka jingbun ki kyrtong ban mih ban ïakhun, u la ong ba ka Constituency 17- North Shillong kan dei kaba bun ki kyrtong hynrei ha u snem 2018 ruh don haduh 7 ngut ki kyrtong mynta mih tam sa uwei kan long phra ngut hynrei watla ki tam ïa kane ruh kan dei ka kabu ka ba bha tam ïa u paidbah ba kin ïoh ïa ka jingbishar bniah halor ki kyrtong bad ma u kum u MLA mynta bad kat dang bun katta dang sngew tynnad ban ïakhun.
