SHILLONG:
Ka um ha pung Umiam ka la nanghiar katba dangmih ka sngi, kaba la pynsngewkhia ïa ki riew iaid mariang ka Meghalaya.
Namar ka jingrang rkhiang ka mariang bad ka jingshit palat ka sngi, ka la nang pynduna ïa ka um ha kane ka pung bad namar ka jingduna um, ki bor ba dei peit ki hap ban khang ïa ka bording ilektrik da ki bun kynta ha ka shisngi.
Namar ka jingduna ka um bad bym ïoh slap haduh mynta, ka surok rim ha Umiam ka la paw bad kiwei ki dewlynnong ki bym ju paw mynno mynno ruh mynta ki la sdang ban mih.
Kane ka pung ka dei kawei na ki jaka ba khring ïa ki nongjngoh kai pyrthei kiba wan sha Meghalaya.
Dangshen u Myntri Rangbah ka Meghalaya u Conrad K Sangma u la pynpaw ïa ka jingbym lah ban pynlip ding ilektrik ha u Kyllalyngkot, Rymphang bad Lber bad ha u Ïaïong la sdang ban pynlip da ki bun kynta namar ba ka la duna palat ka um ha Umiam.
Na ka liang jong u Myntri Rangbah u kyrmen ban sa ïoh ïa u slap uba biang ban pyndap um ïa ka Umiam.
Shuh shuh u AT Mondal, Myntri ka tnad bording u la kdew ba lada ym ïoh ïa u slap uba biang ha ki sngi ki taïew ban wan, ka jingpynlip ding ilektrik kan dangbteng.
“Baroh ki tyllong bording ki shaniah ha ka um bad baroh ki wah ha ka jylla ki la tyrkhong. Mynta ngi la pyndonkam da ka por ban maramot ïa ki jingdonkam ba la julor bad ynda la bit la biang, ngi lah ban pynthikna ban sa kham duna ka jinglip bording”, ong u AT Mondal.
