MAWKYRWAT:
U Myntri ka tnad PHE uba dei u MLA ka Mawkyrwat u Bah Renikton Lyngdoh Tongkhar ha ka 22 tarik Nohprah, u la plie ïa ka Civil Hospital ba 100 jingthiah ha CHC Mawkyrwat ha ka jingïadonlang u Bah Pius Marwein, M.L.A Ranikor kum u Symbud Kongsan, u S.Kumar, I.A.S, Principal Secretary Health & Family Welfare Kong C. Kharkongor, I.A.S, Deputy Commissioner ka South West Khasi Hills District bad kiwei kiwei kiba shah dkhot sngewbha ha kane ka sngi.
Haba kren kum u kongsan, u Bah Renikton u la pynpaw ïa ka jingkmen kaba khraw ha kaba la ïoh ban plie noh ïa kane ka hospital kaba ha ka jinglut baroh ka la kot sha ka T.22.41 klur bad kumba 101 tylli ki kam ba la mang.
U la ai ka burom ïa u nongmihkhmat barim na ka Mawkyrwat constituency Bah (L) Rowel Lyngdoh uba la ïohi jngai ïa ka jingdonkam ban don kum kane ka hospital na ka bynta ka jingmyntoi ki briew jong kane ka dong ka thain bad u khmih lynti ban nang kham pynbha bad ban nang pynbit pynbiang shuh shuh ïa ki jingdonkam jong kane ka hospital ha ki por ki ban wan. U la pynpaw ïa ka jingsngewkmen ha kaba la lah ban pynurlong ïa ka jingangnud bad ka jingphohsniew la bun bun snem jong ki paidbah jong kane ka dong ka thain bad u khmih lynti ba kane ka jaka sumar kan lah ban ai ki jingshakri kiba kham bha ïa ki briew kiba donkam jingïarap ha ka liang ka koit ka khiah.
U la ïathuh ruh ba ka sorkar ka la mang kyrpang lyngba ka Health, PHE bad kiwei kiwei ki tnad na ka bynta ki jingdonkam ban pyntrei ha kane ka distrik kaba la kot sha ka T.700klur eiei ha baroh ki kam pynroi hapoh jong ka distrik bad u pynpaw ïa ka jingkmen ban ïohi ba kane ka dong ka thain ka la sdang ban ïaid shaphrang ha ki liang baroh lyngba ki skhim jong ki department bapher bapher.
Ha kajuh ka por u la ïaroh ïa kane ka tnad kaba la trei shitom ban pynurlong ïa ka jingthmu ha kaba plie ïa kane ka hospital da kaba thung kam shipor ïa ki samla tad haduh ba kin da lah ban pyndep ïa ki exam thung kam na ka bynta ki kam ba la mang. U la khot bad wer ïa ki paidbah bad ki seng bhalang bapher bapher ïa ka jingïatreilang jong ki paidbah khnang ban dang lah ban pynbit pynbiang ïa ki jingdonkam jong kane ka hospital da kaba kyntu ïa ki nongpynïaid bad kiba trei ha kane ka hospital ban trei hok bad ban ai ka jingshakri kaba kham bha bad ban kren ki kyntien jali jaum kiba lah ban long ka jingtngen bad ka jingkyrmen ïa shibun ki mynsiem kiba kordor khamtam ïaki ba thiah pang hakane ka Jaka sumar ka 100 jingthiah.
Katba u Bah Pius Marwein u la ong ba kane ka dei ka sngi sah kynmaw ha kane ka dong ka thain bad namar ba ka jingkoit jingkhiah ka long kaba kordor ka jingplie ïa kane ka hospital kan ai jingmyntoi bad jingkyrkhu khamtam ïa kiba duk ba suk ki bym kot bor ban leit sumar ha ki jaka sumar ba rem dor kiba don shabar ka district bad ka jylla .U la ïaroh ruh ïa ka sorkar MDA kaba la shim khia kyrpang na ka bynta ban pynbha ïa ka koit ka khiah bad ka roi ka par lyngba ki skhim bapher bapher khlem da klet noh ïa u nongïalam barim uba la prat lynti bad uba la trei shitom na ka bynta ban pynurlong ïa kane ka jingphoh sniew. U la kitbok kit rwiang bad ha kajuh ka por u la kyntu ïa ki nongtrei bad ki bor pynïaid jong ka hospital ban ai ka jingshakri kaba biang bad ba paka na ka bynta kito kiba pang kiba shitom bad kiba donkam ka jingïarap.
Ha kane ka sngi la ïoh jingkren ruh na u S.Kumar, ka kong C.Kharkongngor, I.A.S, Deputy Commissioner ka South West Khasi Hills District, Mawkyrwat bad u Bah P.Wanniang u Synjuk Rangbah Shnong, Mawkyrwat bad la ïoh ka jingrwai na ka Seng Samla Shnong Mawkyrwat ka la ai ïa ka phang jong ka jingrakhe dap 50 snem jong ka jingïoh jylla ba pura ka Meghalaya.
