SHILLONG:
La pynlong ïa ka jingpynshai paidbah ha kaba ïa dei bad ka jingsumar da lade ïa lade ban ïoh ïa ka jingkoit jingkhiah bad tip kum ka “Hamara Sankalp Vikasit Bharat”. Ïa kane ka prokram la pynlong hapoh ka madan ïalehkai ha Nongspung ha kaba u ADC ka West Khasi Hills, u Bah V. Swer, ki heh Sorkar na ki tnad bapher bapher bad nongshong shnong ki la ïa shim bynta ha kane ka prokram.
Ha kane ka prokram la ïoh ruh ïa ka jingkren markhmat bad u Myntri Rangbahduh ka ri, u Narendra Modi lyngba ka dur khih ne ka video.
Ha kane ka jingïalang la ïoh ruh ban ai jingpynshai sha ki paidbah nongshong shnong jong ka shnong Nongspung bad Nongsohpian da ki ophisar na ki tnad sorkar bapher bapher halor ki skhim sorkar kmie ki ban ai jingmyntoi ia ki paidbah kiba kynthup naduh ka skhim PMAY-G, PM Kissan, PMUY, MGNREGA, JJM, ka koit ka khiah bad kiwei kiwei kiba ïadei bad ka koit ka khiah.
Na ka liang jong ka tnad ka koit ka khiah ka la pynlong ruh ïa ka jingeksamin ïa ki paidbah ban lap ba ki briew ki don ne em ïa ka jingpang shini, jingpang T.B (Tuberculosis) bad jingpang B.P (Blood Pressure).
Ha kane ka sngi, la don ruh ka jingpule ïa ka jingshim jingkular da ki nongïashim bynta. Ki nongïashim bynta ki la ïathuh ba ki la ïoh ban pdiang ïa ki skhim bapher bapher jong ka Sorkar India kum kynthup ka PMAY-G, PM Kissan, PMUY, MGNREGA bad kiwei ki skhim kiba ïa dei bad ka jingkoit jingkhiah.
