MAWKYRWAT:
Kum shibynta jong ka jingrakhe ïa ka ‘World Day Against Child Labour’ ha ka pyrthei baroh kawei, na ka liang ka ophis jong ka District Legal Service Authority (DLSA) ryngkat ka ophis jong u Labour Inspector, ka ophis jong u District Protection Officer, South West Khasi Hills District ka la ïoh ban rakhe ïa ka sngi hapoh ka Hall jong ka Jakrem Presbyterian Higher Secondary School.
Ka Kong D. Sohtun, Chief Judicial Magistrate-cum-Secretary District Legal Service Authority (DLSA), South West Khasi Hills District haba kren ha kane ka sngi ka la ong ba ban rad-dyngkhong ïa kane ka jingphah trei ha ki kam bapher bapher ïa ki khynnah rit kaba nyngkong eh ka dei ka jingnang jingstad. Shuh shuh ka la ai jingmut ba kum ki khynnah skul ryngkat ka jingkitkhlieh lang jong ki kmie ki kpa la ki dei ha ki jaka sor ne wat kiba don ha ki jaka nongkyndong kim dei ban don ka mynsiem jong ka jingartatien ne buh ha ki ïa kata ka jingduna ha ka ïoh ka kot hynrei ki dei ban ïar ka jingmut namar ki ïoh ki juh ki jinghikai lyngba ki kot pule bad wat ka sorkar ruh ka la don kata ka jingpeit kyrpang ïa ki khynnah ha kaba ia dei bad ka pule puthi.
Shuh shuh haba ai jing kren ha kaba ïa dei bad ka ‘Child Labour’ katkum ka konstitushon jong ka Ri India, ka la ong ba ha ka khyrnit kaba 24 ka la pynshai ba ym shah da lei lei ban pyntrei ïa ki khynnah kiba hapoh ka 14 snem ha ki kynja karkhana kiba lah ban ktah ïa ka koit ka khiah jong u ne ka khynnah. Ka la ong ruh, “Ban shna ïa ki kynja duma kum u Biri, u kyndok jingpruit bad kiwei ki trai jong ki karkhana ki la ju pyndonkam da ki khynnah kiba rit ka arta Namarkata, da kaba ki lap ïa kiba kum kita, lyngba ka jingujor hapoh ka Supreme Court na ka liang ki bor jong ka aiñ mynta ka la khang pyrshah ban phah pyntrei ïa ki khynnah rit ha kiba kum kita ki karkhana ne ha kino ki no ki jing pyntrei ia ki khynnah kiba dang rit ha ka arta ki jongki, la ban rap ka kong D.Sohtun.
La ïoh ruh ban pynshai halor ka ‘Child Labour and Protection Act’ kaba ïada ïa ki khynnah kiba shah pyntrei ha kino kino ki jingtrei kiba ktah bad don jingma ïa ka koit ka khiah jong ki khynnah, ka ong kumtei namar ki khynnah kiba hapoh ka 18 snem ki dang donkam shibun ka jingheh jingsan, ka jingpule bad kiwei de ki jingdonkam ha ka jingim jong ki kiba long lyngba ka jingkyrshan na ki kmie ki kpa.Ka la pynshai ba kim dei ban sngewthuh bakla ha kaba ïa dei bad ki jingtreikam namar ki kam ha ïing ha sem bad ki kam ha ki karkhana ki dei la ka jong. Ka la pynshai ruh ba lada phah treikam ïa ki khynnah, dei ruh ban don ka por ban phah shongthait ym ban shu phah trei jubor namar ka met jong ki ka donkam bun ka por ban shongthait ban ïa ka por ban treikam.
La ïathuh ruh ba ka “Ka sorkar lyngba ka Free & Compulsory Education ka la buh ban peit ba kine ki khynnah rit kim dei ban duh ïa ka jingnang jingstad tang na ka daw jong ka jingduk, bad kiwei de ki daw”. Namarkata, ka la ai mynsiem ïa ki khynnah skul ba kim dei ban pynleh noh ei ïa ka por jong ka jingpule jong ki ïoh la shai la shi-sngi kin sa babe bad ha kajuh ka por ka la kyntu ruh na ka bynta ki kmie ki kpa ba ki dei ban long kiba ai mynsiem na ka bynta ki khun jong ki ha ki jingpule khnang ba ka lawei la shai ka shi sngi jong ki kan long kaba phyrnai.
Kiwei pat ki nongkren ki long u bah Teibormi Kyndiah, Child Protection Officer, South West Khasi Hills District bad u bah Shankurpar S. Kurbah, Labour Inspector, South West Khasi Hills District.
U bah T. Nongsiej, Vice Principal jong ka Jakrem Higher Secondary School, Jakrem uba la pynïaid ïa ka jingïalang bad uba la ai ruh ki kyntien pdiang sngewbha bad ka jingkren khublei na uwei na ki staff napoh ka ophis DLSA, South West Khasi Hills District, u bah S. Sangriang.
