SHILLONG:
U MDC kaMawryngkneng Konstitwensi u bah Pynïaid Sing Syiem, u la ïathuh ba hadien ka jingkhyllem noh ka Executive Committee ba la lamkhmat da u Bah Titosstarwell Chyne mynta ka sngi, ka Khasi Hill Democratic Front (KHDF) ka ban kynthup ïa ki 12 ngut ki MDC ka National People Party bad 6 ngut ki MDC ka Congress kin ïalam ïa ka EC ba thymmai hapoh ka jinglong Chief Executive Member (CEM) u Bah Pyniaid Sing Syiem.
“Kumba phi ïohi ba uwei na ki dkhot ka KHADC u Bah Bajop Pyngrope, u la wanrah ïa ka mat No Confidence Motion hapoh ka dorbar, na ka liang jong ngi, ngi la pynbeit ban don kawei ka kynhun hapoh ka KHADC ka ban ïalam ïa ka, kane ka kynhun ka dei ka Khasi Hill Democratic Front (KHDF) ka ban kynthup ïa ki 12 ngut ki MDC ka NPP bad 6 ngut ki MDC ka Congress”, la ong u Bah Pyniaid sha ki ladpathai khubor.
U la bynrap, “Katkum ki kyndon ka AD Rule, hadien ba la khyllem ka EC barim u chairman u la pynbna ba kan don ka jingthep ïa ka kyrteng u kyrtong u ban ïakhun ïa ka shuki CEM, mynta ka sngi ha ka ba nga la dep ban thep ïa ka kyrteng kum u kyrtong ban ïa khun ïa ka shuki CEM ba thymmai, ha ka bad na kiwei ki liang ym shem la don ba file, kumta lashai ka sngi kan don ka election”.
Ha ba kylli u la ong, “Ki daw kum ba la pyni da ki nongwanrah ïa ka mat No Confidence Motion kadei namar ka bym don shuh ka jingïasngewthuh jingmut, ka jingïahun ban ïa trei lang bad ka Executive Committee ba ïalam u Bah Titosstawell Chyne, ka ba la pynlong ïa ka jingpynkhyllem bad yn ïalam noh da ka wei”.
U la ong shuh shuh, “U Bah Titos , u dei u paralok u ba ïa ieid ïa jan bad u la long CEM la 3 snem duna hynrei u dei na ka party UDP bad ngim don ha kajuh ka party, nga dei la ka jong ka party ban ong ba ka dei ka jingshet kylla kam lah ban long, bad ngin ym lah ban pdiang namar ka dei ka Autonomous ki lah ban ïa treilang bad kano kano ka party ruh hynrei ka thong jong ngi ka long ban kyntiew ïa ka District Council”.
U la ïathuh ba ha ka Khasi Hills Democratic Front, u chairman u bat u Bah Pyniaid Sing Syiem, u Secretary u Bah Teiborlang Pathaw, Assistance Secretary u Bah Carnes Sohshang bad u Vice Chairman u Bah PN Syiem.
Haba kylli halor ka jingkynnoh u CEM barim u la ong “Lada ngi peit ïa ka jingdon ki number ngi la dei ban shimti naduh mynshem snem hynrei ngi la jynsur mynsiem bad ailad shwa ïa ka UDP ba kan ïalam bad ka UDP ka la ïalam la 4 snem mynta bad ki la dei ban ailad noh ïa ka NPP mynta 1 snem”.
U la bynrap, “Ngi la ïalad ïa ka UDP ban kan ïalam mynta la dei ban ailad sa ïa ngi, bad ka nongrim hi ban shimti kum u nongïalam ka long namar ba ngi wan da ka mynsiem jingkitkhlieh ym dei ka jingshah ïalam bakla hangno hangno kumba ki la pynpaw bad ngin ïoh ïa ka jingkyrshan ki paidbah”.
