NONGSTOIÑ:
Ïa ka met ba sah jong ki ar ngut ki heprit kiba dei ki shipara trai, kiba khlad na ka jingshah tyllep khyndew ha ka step jong ka 17 tarik Jylliew hapoh Dommawleiñ Pyndengrei, la tep don burom noh mynta ka sngi ka 19 tarik Jylliew hapoh u lum jingtep ka Balang Presbyterian Mawlangniang WKHD.
Hashwa ban rah leit on tep ïa ka met ba sah jong ka Cafinia Nongsiej, kaba dei ruh ka dkhot ka kynhun rwai ka Kid’s Tarari Choir, lem bad ka para ka Maianylla Nongsiej la sakhi ba kiba bun ki paidbah ki la ïa tuid sha ka shnong Mawlangniang wat hapdeng ka jingpynthut ka mariang ban leit sngewlem bad ai khublei khatduh ïa kitei ki heprit.
La pyndep ïa ka jinglehniam bad lehburom kaba khatduh ïa kaba la pynlong ha phyllaw ïing ka jong ki hi ha ka shnong Mawlangniang, ha kaba u Rev J.T Khardewsaw u la long u chairman bad ha ka jingleh burom la ïoh ruh ïa ki jingkren na ki bahaïing hasem, na ka skul St. Peter HSS, na ka kynhun ka Kid’s Tarari, na ka jingïaseng samla Balang Mawlangniang ka jingrwai na ka ïing ka sem bad la ïoh ruh ïa ka jingpule na ka ktien u Blei da i tymmenbasan P. Marthong, la ïoh ruh ïa ka jingïasyllok pyntngen na u chairman.
Ha kane ka sngi na ka liang jong ka kynhun Kids Tarari ka la ïoh ruh ban pynkhreh ïa ka jingrwai kaba kyrpang ïa kaba la rwai ruh hashwa ban leit on tep ïa kitei ki ar ngut shipara bad kumjuh ïa ka jingrwai kaba la ai kyrteng ‘Mynsiem ba Dang lung’ kaba dei ka jingrwai ba la pynmih da ka Kids Tarai.
