SHILLONG:
U Myntri ki kam pohïing, u Amit Shah ha ka 18 tarik Nohprah u la ong ba ki kam kieng atiar, ki jingïaleh pyrshah ïa ki bor pulit bad bor shipai bad ka jingïap jong ki paidbah ka la duna shibun ha kine ki phra snam ba la dep ha ka Dong Shatei Lam Mihngi. U Amit Shah u la ong kane baroh ka la jia hadien ba ka Sorkar Pdeng NDA ka la ïoh ban bat ïa ka jingsynshar ha India.
Haba kren ha ka jingrakhe Jubili Ksiar jong ka North Eastern Council ha Polo ha Shillong, u Amit Shah u la ïathuh ba ha ka thaiñ Shatei Lam Mihngi, ki kam pyntriem bad kiwei ki jingeh kiba mih na ka, ki la hiar sha ka 70 na ka 100, ka jingïaleh pyrshah ïa ki pulit bad shipai ka la hiar sha ka 60 na ka 100 bad ka jingïap jong ki paidbah na ka daw jong ki kam kieng atiar ka la hiar sha ka 89 na ka 100 naduh ba ka Sorkar NDA ka la ïoh ban bat ïa ka bor. U Amit Shah u la ong haduh 8,000 ngut ki samla kiba la pynïasnoh ialade bad ki seng kiba la shah kheiñ beaiñ, ki la ieh noh ïa kitei ki seng kieng atiar bad pynïasnoh ïalade bad ka imlang sahlang kaba ki la don mynshuwa.
“Ha kane por ba Narendra Modi u Myntri Rangbahduh jong ka India, la ïoh ban ïa soi soskular bad ka NLFT ha ka snem 2019, la ïoh ban ïa soi soskular bad ki Bru bad ki Bodo ha ka snem 2020 bad nangta pat la ïoh ban ïa soi soskular bad ka kynhun kieng atiar Karbi ha ka snem 2021”, la ïathuh u Amit Shah.
“Phra snem mynshuwa ba ka Sorkar NDA kan ïoh ban wan ha ka bor, ka thaiñ Shatei Lam Mihngi ka dap sa tang da ki jingpakhang shnong, ki jingïakhih, ki jingpynbthei bom bad ki jingïasiat; bad ki nongshong shnong jong kane ka dong ka thaiñ kim shym la ïoh ban shongsuk shongshngaiñ na ka daw jong ka jingpynthud pynwit na ki lehnoh bad ki ‘riew kieng atiar”, la ïathuh u Amit Shah. U Myntri ki kam poh iing u la ïathuh ba ha ki por kiba mynshuwa, ka la don ka jingdawa kaba jur ban weng noh ïa ka ain Armed Forces Special Powers Act na ka thaiñ Shatei Lam Mihngi. Hynrei, mynta kane ka jingdawa ka la duna bad sdang jah. “Kumba long mynta 60 na ka 100 ki jaka ha Assam, hynñiew tylli ki district ha Nagaland, 15 tylli ki police station ha ki hynriew tylli ki District ha Manipur, Tripura bad Meghalaya ki long kiba la lait na ka jingpyntrei kam jong ka Armed Forces Special Powers Act bad lait noh sa tang kawei ka District ha Arunachal Pradesh kaba ym pat pynlait na ka jingtrei kam jong ka AFSPA.”, la ïathuh u Amit Shah ha katei ka jingrakhe Jubili Ksiar jong ka North Eastern Council.
U Myntri ki kam poh iing u la ïathuh ba la lah ban leh ïa kine kiei kiei baroh hapoh ka jingïalam jong u Myntri Rangbahduh u Narendra Modi, u ba sngewthuh biang biang ba ki kam pynroi, la ka long ha ka liang ka thoh ka pule, ka koit ka khiah bad ki kam pynroi, kin ym lah ban kiew lada ym don ka jingsuk. U Myntri ula ïathuh ba ha ki por kiba mynshuwa, ki jingai jingïarap bad ki jingbei pisa jong ka Sorkar kim poi sha ki nongkyndong. Hynrei, hadien u Narendra Modi u la long u Myntri Rangbahduh, ki jingai jingïarap bad ki jingbei pisa jong ka Sorkar mynta ki la tuid ruh sha ki nongkyndong bad la pyndonkam na ka bynta ka roi ka san jong ki.
“U Myntri Rangbahduh Narendra Modi u buh ha khmatduh ïa ka jingroi jong ka thain Shatei Lam Mihngi bad ula wan jngoh ïa kane ka dong ka thaiñ la 50 sien ha kine ki phra snem ba la dep” la ïathuh u Amit Shah bad bteng shuh ba ki Myntri jong ka Sorkar Pdeng ki la wan jngoh haduh 400 sien ïa ka thaiñ Shatei Lam Mihngi. “U Modi u la kyntu ïa ka North Eastern Council ban pynkhreh ïa ki kam pynroi jong kane ka dong ka thaiñ na ka bynta ki 25 snem ki ban wan”, la ong u Myntri Amit Shah. Ha kaba ïa dei bad ki jingïakajia pud ha kane ka thaiñ, u Myntri Amit Shah u la ïathuh ba ka jingïapynbeit pud hapdeng ka Meghalaya bad Assam bad kumjuh ruh ka jingïapynbeit pud hapdeng ka Assam bad Arunachal Pradesh ki la jan dep bad jan poh sha kaba kut jong ka jingïapynbeit pud.
