Ka met ba sah jong ka samla na Meghalaya kaba leit pule sha Rajasthan, ha ka 30 Ïaïong ka la poi ha ïing sah jong ka, kaba don ha ka shnong Marngar, Ri Bhoi District.
Kane ka samla ba dangdon 19 snem ka rta ba la tip kum ka Walinda Binong, ka la leit ban pule ïa ka Fashion Designer ha kawei ka skul bah kaba don ha Jaipur jong ka Rajasthan bad la suba ba ka la shah pynïap na ka daw ka jingïabishni, khamtam haba don ki jingshah thombor man ka por ïa ki samla pule na ka Thaiñ Shatei Lam Mihngi ha kane ka jaka bad ka jylla Rajasthan.
Haba kren sha ki lad pathai khubor u kpa jong kane ka samla u la ïathuh ba na ka liang katei ka Skulbah bad ki pulit ki la pyntip ba kane ka samla ka la khlad noh namar ka la dkhat jubor ïa ka jingim, hynrei kum u kpa u don ka jingsngewthuh ba ka khun ka jong u kan nym leh ïa kum kine ki kam hynrei ka don ka jingshah thombor da kiwei pat ki khynnah pule kiba pule lang ha katei ka jaka.
Na ka liang u kpa u la ïathuh ruh ba katei ka samla ka dei kaba ju ïathuh beit sha ïing ïa ki jingeh bad ka jingshah kynthoh bad shah thombor kaba man ka por ha kiwei pat ki para ba pule bad kiba dei na ki bynta pdeng ka ri India. Hynrei ha ka 26 tarik Ïaïong kaba dei shisngi shuwa ban jia katei ka jingjia, kane ka samla ka dang iakren sha ïing ban ïathuh ba ka lah wai na jaka pule bad ban ïakren bad la ka kmie, hynrei ha ka 27 tarik Ïaïong 2023 ha ka por 3:54 janmiet u kpa u la ïoh ïa ka jingkren phun na Rajasthan ban ïathuh ba kane ka khynnah ka shitom jur bad ban phah wan sha Rajasthan.
Na ka liang ka ïing ka sem jong kane ka samla ki dawa na ka Sorkar Meghalaya bad ki bor ka aiñ kin pynïoh ïa ka hok jong kane ka samla, ba kan long ruh ka nuksa ba kan nym jia shuh ha kiwei pat ki samla pule.
